रोहिणीमा घर–संरचना बनाउँदा अनिवार्य नक्शा पास गर्नुपर्ने

भैरहवा– यहाँको रोहिणी गाउँपालिकाले घर एवम् अन्य संरचना बनाउँदा अनिवार्य नक्शा पास गर्नु पर्ने नियम लागू गरेको छ । यसअघि पालिकामा यो नियम लागू भए पनि कडाई गरिएको थिएन । जसले गर्दा कयौं घर तथा अन्य भौतिक संरचना नक्शा पास विनै निर्माण भएका थिए ।

आजदेखि लागू हुने गरी गाउँपालिका क्षेत्रमा संरचना निर्माण गर्दा अनिवार्य नक्शा पास गर्नु पर्ने व्यवस्था गरिएको प्रमुख प्रशासकीय अधिकृत रोमनाथ न्यौपानेले बताए । सोमबार सूचना जारी गर्दै गाउँपालिकाले भनेको छ, ‘गाउँपालिकाभित्र विगतमा बनेका घर, भवन, कलकारखाना एवम् अन्य भौतिक संरचनाको भाद्र ८ गतेदेखि २०७९ असार मसान्तसम्म नक्शा पास नगराए नियमानुसार जरिवाना लाग्ने छ ।’

Advertisement

गाउँपालिका क्षेत्रभित्र नक्शा अभिलेखीकरण गर्नुपर्ने नियम कार्यान्वयन हुनु अघि निर्माण सम्पन्न भएका र नक्सापास हुन बाँकी भवलन, कलकाराखाना तथा संरचनाहरु अभिलेखीकरण असार मसान्तसम्म गरि सक्न गाउँपालिकाले अनुरोध गरेको हो । सो मितिभित्र अभिलेखीकरण गरे बिलम्ब शुल्क नलाग्ने प्रमुख प्रशासकीय अधिकृत न्यौपानेले जानकारी दिए ।

‘अब, नयाँ बन्ने भवन, कलकारखाना एवम् अन्य संरचना बनाउन परे त्यसको अनिवार्य नक्शा पास गराउनु पर्ने छ’, न्यौपानेले भने । अहिले नक्शा पास गरि घर बनाए नियमअनुसारको दस्तुर मात्र लाग्ने र कानूनविपरीत गई संरचना बनाए दस्तुरसँगै जरिवाना समेत लाग्ने भएकाले उनले समयमै नक्शा सम्बन्धि काम गर्न आग्रह गरे ।

साविकको धकधई, पोखरभिण्डी, बगहा, बोदवार, छिपागढ र पजरकट्टी गाविस मिलेर बनेको रोहिणी गाउँपालिकामा ७ हजार हाराहारीमा घरधुरी रहेको गाउँपालिका अध्यक्ष सनोजकुमार यादवले बताए । उनले भने, ‘यस अघि अब्यवस्थित रुपमा बसोबास रहेका कारण बिभिन्न विकास निर्माणका कामहरु गर्न कठिनाई हुने गरेको थियो । ब्यवस्थित बसोबासका लागि घर नक्शा पास अपरिहार्य छ ।’

कानूनअनुसार नक्सापास भए यसले नागरिक र स्वयम् गाउँपालिकालाई पनि सहज हुने भएकोले यो अभियानमा समग्र रोहिणी गाउँपालिकाबासीलाई सहभागी हुन आग्रह अध्यक्ष यादवले गरे । नक्शा पास गरेर भवन भनाए पालिकाको राजश्वमा बृद्धि हुनुका साथै घर तथा भवन व्यवस्थित हुने गाउँपालिकाको विश्वास छ ।