बिदेशी लगानीको टाइगर प्यालेस रिसोर्ट किन्दै रूपन्देहीका भुसाल

भैरहवा– रुपन्देहीमा बिदेशी लगानीमा सञ्चालनमा आएको क्यासिनोसहितको पाँच तारे टाइगर प्यालेस रिसोर्ट जिल्लाकै व्यावसायी बालकृष्ण भुसाल किन्दै छन् । भारतीय पाहुना लक्षित गरेर बेलहिया नाकाबाट नजिकै तिलोत्तमा–१७, कोटिहवामा सञ्चालनमा ल्याइएको यो रिर्सोट जिल्लाको आकर्षणका रुपमा रहेको छ ।

ठूलो क्षेत्रफलमा निर्माण गरिएको रिसोर्ट अवलोकनकै लागि धेरै पुग्ने गरेका छन् । यसलाई सिल्भर हेरिटेज ग्रुपले संचालनमा ल्याएको हो । पछिल्लो केही वर्ष निरन्तर घाटा व्यहोरेपछि लामो समयदेखि रिर्सोट विक्रीको हल्ला चलिरहेको थियो । यही बेला कोरोना महामारी सुरु भयो । अहिले महामारीकै बेला जिल्लालाई केन्द्र बनाएर विभिन्न व्यावसाय सञ्चालन गरिरहेका भुसाालले रिर्सोट किन्न लागेका हुन् ।

Advertisement

अहिले जिल्लाका व्यावसायीबीच रिर्सोटको विक्रीलाई लिएर चर्चा भइरहेको छ । स्रोतका अनुसार यसको खरिदका लागि कम्पनी र भुसाल पक्षबीच सुरुवाती सम्झौतापत्रमा हस्ताक्षर भइसकेको छ । यो रिर्सोट खरिद गरेपछि भुसालले यसको ऋण सकार्ने बताइएको छ । यसको सञ्चालनका लागि मुलुकका विभिन्न बैंकले ऋण लगानी गरेका छन् ।

कोरोनाको पहिलो लहर सुरु भएपछि रिसोर्ट बन्द भएको थियो । पहिलो लहरको संक्रमणमा कमी आएपछि केही समय रिसोर्ट सञ्चालनमा आएको थियो । त्यसबेला यसको भित्री भागमा नयाँ साजसज्जासहित रेष्टुरेन्ट सञ्चालनमा ल्याइएको थियो । लगत्तै दोस्रो लहर सुरु भएपछि पुनः रिर्सोट बन्द भएको थियो । तर, व्यवस्थापनका अनुसार लकडाउन हुनुभन्दा पहिलेदेखि रिसोर्ट आर्थिक संकटमा परेको थियो ।

व्यवस्थापनका अनुसार यसको प्रारम्भिक मूल्यांकन साढे तीन अर्ब रुपैयाँ भन्दा माथि गरिएको छ । खरिद पक्रिया दुई महिनाभित्र पूरा गर्ने तयारी गरिएको छ । यसअघि रिसोर्ट खरिदका लागि मुलुक भित्रै ठूला व्यावसायिक घराना सक्रिय भएका थिए । पहिलो पटक इन्द्रबहादुर थापाले खरिदका लागि सम्झौता गरेका थिए ।

थापाले अप्रत्याशित रुपमा रिर्सोट किन्न तीन अर्ब ७५ करोड रुपैयाँ तिर्ने बताएका थिए । समय बित्दै गयो । यस अवधिमा थापाले बोलेको रकम जुटाउन सकेनन् । त्यसपछि खरिद पक्रिया खेर गएको थियो । यस्तो सम्झौता भएको दुइ वर्षपछि भुसालले सम्झौता गरेका हुन् । उनले खरिदका लागि सुरुमा आफ्नै बचत रकम प्रयोग गर्ने र पछि रिसोर्ट सञ्चालन र सेवा सुविधा बिस्तारमा बैंकको सहयोग लिने बताएका छन् ।

रुपन्देहीका भुसाल न्यू हल्यान्ड ट्याक्टरको मुलुकका लागि आधिकारिक बिक्रेता हुन् । लगानी डुब्ने अवस्था आएपछि घाटामा बेचेर टाइगर प्यालेस रिसोर्टका लगानीकर्ता बाहिरिन लागेका हुन् । यसमा पाँच अर्ब २० करोड रुपैयाँ लगानी भएको बताइन्छ । रिसोर्ट १५ बिघा क्षेत्रफलमा छ । भवनले अहिले दुई बिघा ओगटेको छ ।