भैरहवाको पाँचतारे होटल भिलासामा ‘सिद्धार्थ फुड एण्ड फन’

Advertisement

भैरहवा– नेपाली रैथाने खानाको प्रवर्द्धन गर्न स्वदेशी विभिन्न क्षेत्रका मौलिक स्वादका खानाहरुलाई एउटै स्थानमा ल्याउँदै सिद्धार्थ हस्पिटालिटी ग्रुपले यही जेठ ९ र १० गते भैरहवामा खाना महोत्सव अर्थात् ‘सिद्धार्थ फुड एण्ड फन’ को आयोजना गरेको छ ।

Advertisement

पत्रकार सम्मेलनको आयोजना गर्दै उक्त ग्रुपले भैरहवास्थित होटल सिद्धार्थ भिलासामा सांगीतिक कार्यक्रम सहितको खाना महोत्सवको आयोजना गरिएको जानकारी दिएको छ । महोत्सवमा नेवारी, हिमाली, थारु, मध्यपश्चिम तथा पूर्वी भेगका परम्परागत खानासहित कन्टिनेन्टल, भारतीय, चिनियाँ, अरेबिक तथा मेडिटेरियन परिकारका खानाको स्टल रहने जानकारी आयोजकले गराएका छन् ।

सिद्धार्थ बिजनेस ग्रुप अफ हस्पिटालिटीका सिईओ कृष्ण न्यौपानेले महोत्सवमा नेपाली रैथाने परिकारदेखि अन्तर्राष्ट्रिय खानासम्मको स्वाद एउटै थलोमा उपलब्ध गराइने र आन्तरिक उत्पादनको प्रवर्द्धन, नेपाली परम्परा तथा पहिचानको संरक्षण तथा सम्बर्द्धन गर्ने उद्देश्य महोत्सवको रहेको बताए । ‘यो खाना महोत्सव मार्फत् नेपाली मौलिक खानाको ब्राण्डलाई विश्वसामु पहिचान दिलाउनु पनि हाम्रो उद्देश्य हो’, न्यौपानेले भने । यो महोत्सव सिद्धार्थ बिजनेश ग्रुपको भैरहवा क्षेत्रमा पहिलो भएको उनले जनाए ।

महोत्सवमा खाना खाने प्रतियोगिता, घरेलु खाना पकाउने प्रतियोगिता, बालबालिकामुखी खेल, मनोरञ्जनात्मक गतिविधि तथा विभिन्न सहभागितामूलक कार्यक्रम सञ्चालन गरिनेछ । खाना पकाउने प्रतियोगितामा इच्छुक सहभागीले सिद्धार्थ भिलासा भैरहवामा सम्पर्क गरि नाम दर्ता गरेर भाग लिन सक्ने व्यवस्था मिलाइएको छ ।

मेचीदेखि महाकालीसम्म फैलिएको सिद्धार्थ ग्रुपले आफ्नै लगानीका सञ्चालित ३० वटा होटलमा कार्यरत सेफले आ–आफ्नो भेगका बिशेष परिकार महोत्सवमा उपलब्ध गराउने छन् । महोत्सवमा राष्ट्रिय तथा स्थानीय कलाकार, ब्याण्डको सांगीतिक प्रस्तुती रहने छ । महोत्सवको पहिलो दिन जेठ ९ गते गायिका समीक्षा अधिकारी र गायक अर्जुन सापकेटाको प्रस्तुति रहनेछ भने जेठ १० गते गायक दीपक बज्राचार्य र उनको ब्याण्डले सांगीतिक प्रस्तुति दिनेछन् । दुवै दिन लुम्बिनी क्षेत्रका स्थानीय कलाकारले पनि लोक तथा सांस्कृतिक प्रस्तुति दिने छन् ।

सिद्धार्थ हस्पिटालिटीका क्षेत्रीय निर्देशक महेन्द्र न्यौपानेले महोत्सवमा उपलब्ध गराइने खानाको परिकारको मूल्य पाँचतारे होटल अनुरुप नभएर सामान्य दरमा उपलब्ध गराइने जनाए ।

हाल सिद्धार्थ हस्पिटालिटीअन्तर्गत पाँचतारे स्तरमा सिद्धार्थ भिलासा, चारतारे स्तरमा सिद्धार्थ वैभव र तीनतारे स्तरमा सिद्धार्थ बाटिका ब्रान्ड सहित नेपालको विभिन्न ३० स्थानमा सिद्धार्थ कटेज एवम् सिद्धार्थ क्याफे संचालनमा छन् । २ हजार ५ सय भन्दा धेरै रोजगार छन् । यो उत्सवले भैरहवा र आसपासलाई गुल्जार बनाइ पर्यटकीय विकासमा टेवा पुग्ने क्षेत्रीय निर्देशक न्यौपानले बताए ।