भैरहवामा सेजमा संचालनमा आउँदैछ मुलुककै ठूलो गार्मेन्ट उद्योग

Advertisement

भैरहवा– भैरहवास्थित विशेष आर्थिक क्षेत्र (सेज)मा गार्मेन्ट गियर प्रालि उद्योग निर्माण तीव्र रुपमा भइरहेको छ । उक्त गार्मेन्ट आगामी अबको चार–पाँच महिनामै सञ्चालन गर्ने तयारी गरिएको छ । स्वदेशी उत्दानमा आधारित उक्त गार्मेन्टबाट उत्पादित कपडा बजारमा पठाइने तयारी छ ।

Advertisement

उक्त उद्योगको करिब ८० प्रतिशत काम सम्पन्न भएको छ । कुसे औँसीमा बुवाको मुख हेर्दा उपहारका रूपमा दिन मिल्ने गरी सर्ट र पाइन्ट बजारमा ल्याउने तयारीसहित काम भइरहेको छ ।

उक्त गामेन्ट उद्योगमा भाटभटेनी सुपर स्टोरका सञ्चालक मीनबहादुर गुरुङ, शिक्षा, स्वास्थ्य र जलविद्युत् क्षेत्रमा लगानी गरेको व्यवसायी उमेश श्रेष्ठ, पूर्वाधार क्षेत्रमा काम गरिरहेका रामकृष्ण खतिवडा, पूर्वबैंकर किरणकुमार श्रेष्ठ र ऊर्जा व्यवसायी राजेश श्रेष्ठको लगानी छ । उक्त उद्योगमा भाटभटेनीका सञ्चालक गुरुङ र शिक्षा क्षेत्रका व्यवसायी उमेश श्रेष्ठको मुख्य लगानी छ ।

उद्योगले यसै वर्षको वैशाखबाट उत्पादन बजारमा ल्याउने भनेको थियो । तर, गत भदौमा भएको जेनजी आन्दोलनमा भाटभटेनीमा ठूलो क्षति भएको र अर्थतन्त्रमा प्रतिकूल परिस्थिति बनेका कारण उद्योग निर्माणको काम घोषित समयमा सम्पन्न हुन सकेन ।

उक्त व्यावसायिक समूहले प्रवद्र्धन गरिरहेका सबै आयोजना जेनजी आन्दोलनपछि ६ महिनाका लागि पछाडि सारिएको लगानीकर्ताहरूले बताएका छन् ।

उक्त उद्योगलाई उत्पादन केन्द्रका रूपमा मात्र नभई नेपालको निर्यातमुखी औद्योगिक क्षेत्रलाई नयाँ दिशा दिने रणनीतिक परियोजनाका रूपमा हेरिएको छ । उद्योगले उच्च गुणस्तरका तयारी पोसाक उत्पादन गरी अन्तर्राष्ट्रिय बजारमा नेपाली उत्पादनको उपस्थिति विस्तार गर्ने लक्ष्य लिएको छ ।

गार्मेन्ट गियरबाट उत्पादन भएका सामग्री नेपालमा भाटभेटनीमार्फत बजारमा लैजाने योजना छ । त्यसबाहेक, भारत, अमेरिका र युरोपका देशमा तयारी पोसाक निर्यात गर्ने योजना छ । उत्पादन भएका तयारी पोसाकमध्ये ४० प्रतिशत नेपाली बजारमा र ६० प्रतिशत विदेशी बजारमा लैजाने योजना बनाइएको छ ।

उद्योग निर्माण तथा सञ्चालनका लागि कम्पनीले दीर्घकालीन र अल्पकालीन गरी कुल १ अर्ब ३० करोड रुपैयाँ बराबरको बैंकिङ कर्जा सुविधाको रेटिङ गराएको छ । जसमध्ये ८० करोड रुपैयाँ दीर्घकालीन र ५० करोड रुपैयाँ अल्पकालीन कर्जा सुविधा हुने गरी रेटिङ गराएको छ ।

उद्योगले वार्षिक करिब ५७ लाख ६० हजार थान विभिन्न प्रकारका तयारी पोसाक उत्पादन गर्ने लक्ष्य राखेको छ । उद्योगले मुख्य रूपमा डेनिम बटम, लेगिङ, जेगिङ, ट्रेगिङ, प्यान्ट, सर्ट तथा निटवेयर उत्पादन उद्योगका कार्यकारी निर्देशक रामकृष्ण खतिवडाले जनाएका छन् ।

सेजमा २५ वर्षको लागि भाडामा लिएको एक लाख ३४ हजार स्क्वायर फिट जग्गामध्ये ९० हजार स्क्वायर फिटमा उद्योग क्षेत्र निर्माण भइरहेको छ । जसमा एक हजार २०० जना कामदारले एकै पटक काम गर्न सक्ने उद्योगको क्षमता छ ।