‘डाकिनी’मा तीन करोड पारिश्रमिक लिने सिनेमेटोग्राफर मार्क ली को हुन् ?

चलचित्र ‘डाकिनी’मा सिनेमेटोग्राफरले तीन करोड रुपैयाँ पारिश्रमिक लिएका छन् । साढे नौ करोड लगानीमा बनेको चलचित्रमा सिनेमेटोग्राफरले तीन करोड पारिश्रमिक लिएका हुन् । 

Advertisement

तर, यसका कलाकार तथा निर्माता रवीन्द्रसिंह बानियाँ भने सिनेमेटोग्राफरले तीन करोड पारिश्रमिक नभएर पकेटमनी मात्रै लिएको बताउँछन् । “डाकिनीमा हामीले सिनेमेटोग्राफरलाई पारिश्रमिक दिएका हैनौं, उहाँलाई हामी पारिश्रमिक दिन सक्दैनौँ,” उनले भने, “वास्तवमा तीन करोड त उहाँको हामीले चिया खर्च लिएजस्तो मात्रै हो ।” नेपालमा तीन करोडमा बनेका चलचित्रलाई बिग बजेटका चलचित्र भनिन्छ । 

‘डाकिनी’ सिनेमेटोग्राफर मार्क ली पिङ बिङले खिचेका हुन् । ताइवानी सिनेमेटोग्राफर मार्क ली विश्वकै उत्कृष्ट सिनेमेटोग्राफरमध्येका एक हुन् । 

उनले २१ अन्तर्राष्ट्रिय अवार्ड प्राप्त गरिसकेका छन् । उनले  सन् २००० मा वङ कर वाइको फिल्म ‘इन द मुड फर लभ’का लागि कान्स फिल्म फेस्टिभलको ग्रान्ड टेक्निकल प्राइज पाएका थिए । मार्क लीले खिचेका चर्चित फिल्ममा ‘इन द मुड फर लभ’सहित ‘द असासियन’, ‘रेनोयर’, ‘नर्वेजियन उड’, ‘फ्लाइट अफ रेड बलुन’लगायत छन् ।

मार्क ली एकेडेमी अफ मोसन पिक्चर एन्ड साइन्सेज (ओस्कर अवार्ड)का सदस्यसमेत हुन् । उनले ‘डाकिनी’ निर्देशक खिन्से नोर्बु (जोङसार खिन्से रिम्पोछे)सँगको सम्बन्धका कारण मात्रै ‘डाकिनी’ खिचेको रवीन्द्रको भनाइ छ । खिन्से ठूला बौद्ध धर्मगुरु हुन् । 

खिन्सेले ‘डाकिनी’का लागि चीनबाट क्राउड फन्डिङबाट पैसा जुटाएका थिए । एक घण्टामा क्राउड फण्डमा साढे नौ करोड रुपैयाँ जम्मा भएको रवीन्द्रले जानकारी दिए । 

‘डाकिनी’ पनौती र ललितपुरको पाटनमा खिचिएको थियो । 

चलचित्रको मुख्य भूमिकामा भियतनामका छिरिङ तासी र अमेरिकाबाट आएकी तेन्जिङ कुन्सेल छन् । भारतमा जन्मिएका यी दुवै कलाकार तिब्बती मूलका हुन् । नेपालका रवीन्द्रसिंह बानियाँ, दिव्यदेव, कर्मालगायत कलाकारको अभिनय छ ।