दशैंको अवसर पारेर ‘चमेलीको पोइ’ देशभर प्रदर्शन हुँदै

Advertisement

भैरहवा–एभरेष्ट सूर्य बोहराको लेखन तथा निर्देशनमा निर्माण भएको नेपाली चलचित्र ‘चमेलीको पोइ’ दशैंको अवसर पारेर देशभर प्रदर्शनमा आउने भएको छ ।

Advertisement

चलचित्र असोज १६ गतेदेखि प्रदर्शनमा आउने निर्माता सुनीता सापकोटाले जानकारी दिएकी छन् । चलचित्रको ट्रेलरसमेत सार्वजनिक भइसकेको छ । ट्रेलर सार्वजनिक भएपछि चलचित्रको कथावस्तुलाई लिएर दर्शकको चासो बढेको निर्माण पक्षको भनाइ छ ।

चलचित्रमा सुरक्षा पन्त र मुकुन भुसाल मुख्य भूमिकामा देखिएका छन् । उनीहरूसँगै नारायण त्रिपाठी, विल्सन विक्रम राई, रवीन्द्र झा, उमेश राई, खड्गबहादुर पुन, अंशु महर्जन, रजनी गुरुङ, गणेश गौतम र प्रेमदेव गिरीलगायत कलाकारको अभिनय छ ।

चलचित्रमा हास्य कलाकार नारायण त्रिपाठीको पुनरागमनलाई पनि विशेष रूपमा लिइएको छ ।

निर्माता रामनारायण उपाध्यायका अनुसार चलचित्र सामाजिक विषयवस्तुलाई आधार बनाएर तयार गरिएको छ । यो आफ्नो पहिलो चलचित्र निर्माण प्रयास भए पनि समय, परिस्थिति र बजारको अवस्थालाई बुझेर आगामी दिनमा पनि निरन्तर चलचित्र निर्माण गर्दै जाने उनले बताए ।

चलचित्रमा सुनीता सापकोटा र रामनारायण उपाध्याय निर्माता तथा उदयविक्रम राणा र ऋतु मल्ल ठकुरी कार्यकारी निर्माता छन् । निर्देशक बोहराको कथामा शिवम अधिकारीले पटकथा तथा संवाद लेखनमा सहकार्य गरेका छन् ।

चलचित्रका लागि राजनराज शिवाकोटी र आशिष अविरलले संगीत दिएका छन् । भने कविराज गहतराजले कोरियोग्राफी र कुमार महर्जनले द्वन्द्व निर्देशन गरेका छन् ।

निर्माणको प्रारम्भिक चरणदेखि नै कलाकारको विविधता, हास्यप्रधान प्रस्तुति तथा सामाजिक र पारिवारिक विषयवस्तुका कारण चर्चामा रहेको ‘चमेलीको पोइ’ ले अब दशैंको माहोलमा दर्शकमाझ चलचित्रको बजार तताउने तयारीमा छ ।