आशाको केन्द्र गौतमबुद्ध विमानस्थल

ठाकुरकुमार श्रेष्ठ
२०८१ भाद्र १७

402 Share

सबैलाई थाहै भएको कुरा हो, सिद्धार्थ उद्योग बाणिज्य संघले गौतमबुद्ध अन्तर्राष्ट्रिय विमानस्थल भैरहवामा बन्नुपर्छ भनेर आवाज उठाउने पहिलो संस्था हो । २०६० सालमा विश्व पर्यटन केन्द्र लुम्बिनीलाई मुख्य केन्द्रमा राखेर भैरहवामा अन्तर्राष्ट्रिय विमानस्थल बनाउन पहलस्वरुप सरकारलाई घचघच्याउने उद्देश्यले संघले टोकन मनीका रुपमा बजेट विनियोजन गरेर दवाव दिएको थियो । हाम्रो पहल र सरकारले आवश्यकता महसुस गरेर विमानस्थल तयार गरेको छ । केही अन्तर्राष्ट्रिय उडान पनि भएका छन् । भैरहवामा अन्तर्राष्ट्रिय विमानस्थल बन्दा सबैभन्दा खुशी सिद्धार्थ उद्योग बाणिज्य संघ थियो, यसका साथै समग्रह रुपन्देहीसहित देशबासी थिए ।

तर, विडम्बना भन्नुपर्छ उद्घाटन भएर एउटा पनि नियमित अन्तर्राष्ट्रिय उडान हुन सकेको छैन । पहिला विमानस्थल बन्दा जति खुशी थियौं, अहिले पूर्णक्षमतामा नचल्दा हामी सबैभन्दा दुखी छौं । यसमा राज्यको ध्यान जानुपर्छ भन्ने हाम्रो मान्यता हो ।

विमानस्थल निर्माणकै क्रममा देखिएका समस्या समाधानदेखि उद्घाटन भएयता हामीले नियमित अन्तर्राष्ट्रिय उडानका लागि निरन्तर पहल र दवावमूलक कार्यक्रम गरिरहेका छौं । हामीसँगै यस क्षेत्रका दर्जनौं संघसंस्थाले यसका लागि पहल गरिरहेको कुरा सबैमाझ छर्लङ्ग छ ।

भैरहवा, लुम्बिनीसहित सिंगो प्रदेश र मुलुककै भविष्य जोडिएको विमानस्थललाई लक्षित गरी निजी क्षेत्रबाट ८० अर्ब हाराहारी लगानी भएको छ । सरकारी लगानी करिब ४० अर्ब लगाएर विमानस्थल तयार भएको छ । तत्कालीन प्रधानमन्त्री स्वर्गीय सुशील कोइरालाले विमानस्थल शिलान्यास गर्दा भन्नुभएको थियो– अब भैरहवामा अन्तर्राष्ट्रिय विमानस्थल तयार हुन लाग्यो । निजी क्षेत्रले होटल बनाउनुस्, उद्योग खोल्नुस् ।

त्यसपछि दैनिक हजारौं पर्यटक आउने र यहाँ उत्पादन भएको वस्तु विदेश निर्यात हुने अपेक्षाले त्यसपछि निजी क्षेत्रले अर्बौं लगानी गर्यो । स्तरीय होटल थपियको थपियै छन् । तर, विमानस्थल पूर्णक्षमतामा चल्ने कहिले हो कुनै टुंगो छैन ।

विमानस्थलबाट नियमित अन्तर्राष्ट्रिय उडान गर्न र पूर्ण क्षमतामा संचालनका लागि सिद्धार्थ उद्योग बाणिज्य संघले विगतदेखि नै अग्रपंक्तिमा रहेर नेतृत्वमूलक रुपमा सरकारलाई घचघच्याउने काम गरिरहेको छ । म स्मरण गराउन चाहन्छु, अहिलेसम्म पूर्वप्रधानमन्त्रीदेखि वर्तमान प्रधानमन्त्रीसम्म र संघका अर्थ, पर्यटन, गृहदेखि प्रदेशका मुख्यमन्त्री र मन्त्रीहरुसम्मलाई हामीले विमानस्थल संचालनमा देखिएका समस्या, समाधानका उपायबारे ज्ञापनपत्रमार्फत् प्रत्यक्ष भेटेर जानकारी गराएका छौं । यस्तै, तत्काल विमानस्थल चलाउन दवाव पनि दिएका छौं ।

नेपालस्थि सबै अन्तर्राष्ट्रिय विमान कम्पनीहरुमा पुगेर सम्बन्धित व्यक्तिलाई भेटेर भैरहवाबाट अन्तर्राष्ट्रिय उडान भर्न अनुरोध गरेका छौं । विभिन्न छलफल, गोष्ठी, अन्तरक्रिया लगायत कार्यक्रम गरेर पनि विमानस्थल संचालनबारे चासो र चिन्ता व्यक्त गरिरहेका छौं । तर, अझै नियमित रुपमा एउटा पनि उडान हुन सकेको छैन ।

हाम्रो निरन्तरको दवावमूलक प्रयासले पछिल्लोपटक सरकारले स्वास्थ्य परीक्षण, अभिमुखीकरण तालिम केन्द्र, बिमा, श्रम स्वीकृत, भिसा यहीबाट जारी गर्ने कार्यालय र म्यानपावर कम्पनीहरु स्थापना लगायतका निर्णय गरेको छ । यस्तै, अन्तर्राष्ट्रिय हवाई उडानमा हवाई टिकटमा लगाउँदै आएको ३ हजार रुपैयाँ यात्रुसेवा शुल्क पूर्णरुपमा छुट दिने, हवाई टिकटमा लगाउँदै आएको १ हजार रुपैयाँ पर्यटन शुल्क पूर्णरुपमा छुट दिने, अन्तर्राष्ट्रिय हवाई उडानमा पार्किङ, ल्याण्डिङ र न्याभिगेसन शुल्क पूर्णरुपमा छुट दिने, विमानस्थलमा लाग्दै आएको अन्तर्राष्ट्रिय हवाई उडानमा ग्राउण्ड ह्याण्डलिङ शुल्कमा ७५ प्रतिशत छुट दिने, इन्धन सुविधामा छुट दिने लगायतका निर्णय गरेको छ । यो स्वागत योग्य छ ।

सम्मानीय प्रधानमन्त्री केपी शर्मा ओली, पूर्वप्रधानमन्त्री शेरबहादुर देउवा, उप्रधानमन्त्री तथा अर्थमन्त्री विष्णुप्रसाद पौडेल, पर्यटन मन्त्री बद्रीप्रसाद पाण्डे लगायत सरकारलाई पछिल्लो निर्णयप्रति हार्दिक धन्यवाद व्यक्त गर्दछौं । हाम्रो माग निर्णय मात्रै गर्ने होइन्, तत्काल कार्यान्वयन होस् भन्ने हो । विगतमा गरिएका कयौं निर्णय अलपत्र रहेको अवस्थामा अहिलेको निर्णय पनि कतै कार्यान्वयन नै नहुने त होइन् भन्ने चिन्ता पनि छ । तर, हाम्रो चिन्ता गलत सावित होस् र निर्णय कार्यान्वयन भई नियमित अन्तर्राष्ट्रिय उडान होस् ।

धरासायी बनेको निजी क्षेत्रलाई उकास्न र पर्यटनबाट आर्थिक समृद्धि हासिल गर्न विमानस्थल चल्नुपर्छ र चलाउन जरुरी छ । हाम्रो माग तत्काल नेपाल वायु सेवाबाटै भए पनि भैरहवा–दिल्ली, भैरहवा–चीन, भैरहवा–थाइल्णड, भैरहवा–श्रीलंका लगायतका देशमा उडान होस् भन्ने हो । यसका साथै सरकारले अन्तर्राष्ट्रिय वायुसेवा कम्पनीलाई आकर्षित गरी भैरहवाबाट नियमित उडानको पहल गरोस् भन्ने छ । सँगसँगै भैरहवाबाट आन्तरिक उडानतर्फ पनि कनेक्टिभिटी बढाई भैरहवा–विराटनगर, भैरहवा–नेपालगंज, भैरहवा–धनगढी, भैरहवा–जनपुर जस्ता सहरहरुमा उडान सुचार गर्न पनि माग गर्दछौं ।

बेलहिया नाका व्यवस्थापन, भारतीय पर्यटकले नेपाल आउँदा २५ हजार रुपैयाँ मात्रै ल्याउन पाउने अहिलेको प्रावधानलाई बढाएर कम्तिमा पनि ५ हजार डलर बराबरको रकम बनाइयोस् भन्ने हाम्रो माग छ । यस्तै, निर्माणाधीन आइसीपीमा रेलवे कनेक्सनका लागि भारत सरकारसँग पहल होस्, नारायणगढ–बुटवल जस्ता कयौं सडकका कारण पर्यटन क्षेत्रमा परिरहेको प्रभावलाई निर्मूल पार्न मुलुकभरका सडक संजाल निर्माण मर्मतका काम तत्काल सम्पन्न गरियोस् । विश्व पर्यटन केन्द्र लुम्बिनीमा भइरहेको विकास निर्माणलाई व्यवस्थित गरी पर्याप्त बजेट विनियोजन गरियोस् । चालु आवमा सरकारले बजेट विनियोजन नगर्दा लुम्बिनीको काम अलपत्र भइरहेको अवस्था छ । यसमा तत्काल ध्यान दिन जरुरी छ ।

(गौतमबुद्ध विमानस्थलबाट नियमित अन्तर्राष्ट्रिय उडान गर्नका लागि पहल स्वरुप अघिल्लो हप्ता भैरहवामा आयोजित कार्यक्रममा सिद्धार्थ उद्योग बाणिज्य संघका अध्यक्ष श्रेष्ठले राखेको विचारको सम्पादित अंश ।)