भैरहवाको मुटुमा तरकारी मण्डीको बिजोग

भैरहवा– सिद्धार्थनगर नगरपालिका प्रमुख इस्तियाक अहमद खानले स्थानीय निर्वाचनका बेला दिएको ‘ब्युटीफूल भैरहवा’ भन्ने नाराको खुब चर्चा थियो । स्थानीय मतदाता, शुभेच्छुक र सञ्चारकर्मीसित कुराकानीमा उनी भैरहवालाई मुलुककै नमूना र ब्युटिफूल सहर बनाउने बताउँथे । त्यसपछि यहाँका बासिन्दाको मुखमुखबाट ब्युटिफूल भैरहवाको चाहना सुनिन्थ्यो । अहिले आएर नगर प्रमुख मात्र ‘ब्युटिफूल’ लाग्छन्, नगरको अवस्था उस्तै छ । नगरभित्रका सबै संरचना व्यवस्थित हुन सकेका छैनन् ।

Advertisement

नगर प्रमुख खानले मात्रै होइन्, उपप्रमुख उमा अधिकारीले पनि नगरको सौन्दर्यता, बजार व्यवस्थापन लगायतका विषयमा निर्वाचनका मुखमा खुबै भाषण गरेकी थिइन् । उनीहरुका भाषण जनताले पत्याए र निर्वाचित गरे । तर, प्रमुख र उपप्रमुखले भनेअनुसार काम गर्न सकेनन् । जसले गर्दा बजारका मुख्य संरचनादेखि हरेक कुरा व्यवस्थित हुन सकेका छैनन् ।

Advertisement

सहर कति सुन्दर भन्ने कुुरा सर्वसाधरणको जमघट हुने स्थानको अवस्थाले दर्शाउँछ । सडक, जमघटस्थल, चिया, चमेना गृह, बजार, तरकारी मण्डी, बगैँचा व्यवस्थापनले सहरको सुन्दरता प्रष्टयाउँछन् । तर, सिद्धार्थनगर–८, स्थित मायादेवी तरकारी मण्डी (बजार) ले लामो समयदेखि नगर प्रमुख र उपप्रमुखको नारालाई गिज्याइरहेको छ । भैरहवाको मुटुमा रहेको तरकारी बजार हेर्दा नगरमै सबैभन्दा अव्यवस्थित देखिन्छ ।

केही दिन अघि पानी पर्यो । केही बेरमा तरकारी बजार हिलाम्य बन्यो । बजारमा गएर तरकारी खरिद गर्न हिलो बाधक बन्यो । बजारमा रहेका बोर्डमा ताजा तरकारी पाइन्छ, उल्लेख गरिएको छ । त्यहाँ पसलको सरसफाईको अवस्था नाजुुक छ । तरकारी हेर्दा ‘फ्रेस’ देखिन्नन् । सानो क्षेत्रफलमा धेरै पसल र ठेला राख्दा बजारै कुरुप देखिन्छ । साँझ बिहान ठेलमठेल चल्छ ।

बिहान ८ देखि १० बजे भित्र मुख्य सडकदेखि नै साइकल, मोटरसाइकल, गाडी र ठेलाले बजार र सडक जाम हुने गरेको छ । पाइला राख्ने ठाउँ भेटिँदैन । त्यस्तो बेला तरकारी खरिद गर्न जाँदा एकले अर्कोलाई धक्का दिएरै एक छेउबाट अर्कोसम्म पुर्याउँछन् । जहाँ पायो त्यहीँ थुक्नेदेखि हिँड्दा सवारीका साधन ठोकिन्छन् । साँझ बिहान बजारको प्रवेशद्वारदेखि पसल थाप्ने गरिएको छ । बीचमा ठेलामा फलफूल र तरकारी ब्यापारी बसिरहेका हुन्छन् । अलिकति खाली स्थानमा ग्राहकले गाडी, मोटरसाइकल र साइकल लगेर पार्किङ गर्छन् ।

यस्तो भद्रगोलमा सर्वसाधरणले सुरक्षित ढंगले कसरी तरकारी खरिद गर्ने ? मण्डी भित्रका पसलले ग्राहक हिँड्ने बाटोमा समेत तरकारी भण्डारण गर्ने गरेका छन् । यसले बजार फोहोर र कुरुप देखिने गरेको छ । तरकारी मानव स्वास्थ्यका लागि महत्वपूर्ण बस्तु हो । तर, यही बजारमा देखिएको भद्रगोल कसरी र कहिले अन्त्य हुन्छ ? ठेगान छैन ।

अर्कोतर्फ तरकारी बजार बाहिर ट्राफिक व्यवस्थापनमा लापरबाही छ । तरकारी मण्डी स्थलको अगाडि र आसपास गाडी र मोटरसाइकल जथाभावी पार्किङ गरिन्छ । ठूला गाडी प्रवेश गर्दा कामकाजीले हैरानी बेहोर्नु परेको छ । यस क्षेत्रमा नियमले सवारीका साधन चलाउने कोही भेटिँदैन । जसले गर्दा लामो समय जामको समस्या छ । जाम खुलाउन प्रहरी तैनाथ हुँदैनन् । भीडभाड र लापरबाहीले तरकारी मण्डी क्षेत्रमा दुर्घटनाको खतरा देखिन्छ ।

स्थानीय कृष्ण आचार्यले तरकारी बजारको दूरावस्थाप्रति कसैको चासो नभएको बताउँछन् । ‘यस्तो अव्यवस्थित र भद्रगोल तरकारी बजार अन्यत्र छैन, हाम्रा जनप्रतिनिधि के हेरेर बसेका छन् अत्तोपत्तो छैन’, उनले भने, ‘चुनावका बेला मिठामिठा गफ र नारा दिनेले काम गर्दैनन् भन्ने उदाहरण तरकारी बजार बनेको छ ।’ यो तरकारी बजारलाई कति कान्छी बजार पनि भन्छन् । यहाा नगरपालिकाले ठेकेदारमार्फत् मण्डी संचालन गरेको छ । नगरले चासो नदिँदा ठेकेदारले व्यवस्थापनमा धयान नदिएको आरोप लाग्ने गरेको छ । नगर प्रमुख र उपप्रमुखका नारा, ठाउँठाउँमा गर्ने भाषण बोलीमै सीमित हुँदा तरकारी बजार झनपछि झन कन्त विजोग बन्दै गएको आरोप नगरबासीको छ ।