रोटरी सेन्ट्रल लुम्बिनीको अध्यक्षमा भण्डारी, समाजिक सेवालाई थप प्रभावकारी बनाउन जोड

Advertisement

भैरहवा– रोटरी क्लब अफ सेन्ट्रल लुम्बिनी वर्ष २०२६–२०२७ को अध्यक्षमा गंगाधर भण्डारी चयन भएका छन् । नवनिर्वाचित कार्यसमितिको शनिबार भैरहवामा एक समारोहबीच पदास्थापन गरिएको छ ।

Advertisement

कार्यक्रममा वर्ष २०२५–२०२६ का अध्यक्ष विष्णु शर्माले नवनर्विाचित अध्यक्ष भण्डारीलाई पद हस्तान्तरण गरे । १५ सयदस्यीय नयाँ कार्यसमितिलाई उक्त अवसरमा पद तथा गोपनियताको सपथ समेत गराइएको थियो ।

क्लबको निवर्तमान अध्यक्षमा विष्णु शर्मा, प्रथम उपाध्यक्षमा बासु बडाल र द्वितिय उपाध्यक्षमा विना भण्डारी चयन भएका छन् । यस्तै, सचिवमा उपेन्द्र यादव, कोषाध्यक्षमा टेकराज पाण्डे, चेयर मेम्बरसिपमा दुर्गा पराजुली, चेयर क्लब एडमिनमा विक्रम मल्ल र चेयर सर्भिसमा राम थापा चयन भएका छन् । यसैगरी तीआरएफ चेयर शिवशंकर जैसवाल, चेयर पब्लिक इमेजमा दीपक वर्नवाल, सर्जेन्ट एड एआरएममा गोपाल आचार्य, क्लब इडिटरमा कमल कार्की, टीच चेयरमा शान्ति शर्मा र जेटी ट्रेजर्ररमा राजेश अग्रहरी चयन भएका छन् ।

कार्यक्रममा बोल्दै रोटरीका वर्ष २०२६–२०२७ का डिष्ट्रिक गभर्नर विष्णुबहादुर कार्कीले निवर्तान अध्यक्ष विष्णु शर्माको टिमले समाजमा निकै प्रभावशाली काम गरेको जनाए । नयाँ अध्यक्ष भण्डारीको टिमले पनि अझ राम्रो गर्ने विश्वास उनले व्यक्त गरे । रोटरीले गर्ने भनेकै सेवा भएकाले त्यसमा ध्यान दिन उनको आग्रह छ । सामूहिक भावनाले काम गरेकै कारण रोटरीका काम समाजमा देखिएको जनाउँदै कार्कीले कुनै काम धेरै ठाउँमा छरिएर भन्दा निश्चित ठाउँ तोकेर गरेमा त्यसले प्रभावकारिता दिने जनाए ।

लुम्बिनी प्रदेश सभा सदस्य हेमा बेल्बासे केसी रोटरीले समाजमा छरिएर बसेका तर सेवाभाव रहेका सबैलाई समेटेर सामाजिक काम गरेको जनाइन् । आँखा शिविर गरेर पुण्य काम गरेको, गएको कार्यकालमा निकै राम्रो र प्रभावकारी काम भएको बताइन् । उनले रोटरीले समाजमा मल्हम् लगाउने काम गर्दै आएको बताउँदै अभावमा रहेकालाई उज्यालो छर्नु नै महत्वपूर्ण रहेको सुनाइन् । नयाँ नेतृत्वले मानवीय सेवालाई थप परिस्कृत र प्रभावकारी बनाउँदै लैजाने विश्वास उनले व्यक्त गरिन् ।

निवर्तमान अध्यक्ष विष्णु शर्माले आफ्नो कार्यकालमा धेरै अवार्डहरु पाउन सफल भएको भन्दै खुशी व्यक्त गरे । वृक्षारोपण, शैक्षिक सामाग्री सहयोग, बृद्धााश्रममा सहयोग, मानवसेवा आश्रममा भोजन सहयोग, आँखा शिविर, गरिब तथा विपन्नलाई सहयोग, ट्रयाकसुट र झोला वितरण, बाग्लुङमा कम्प्युटर ल्याब स्थापना, महिला सशक्तीकरणका लागि व्यवसायिक सिपमूलक तालिम, डायलासिस विरामीको उपचारमा आर्थिक सहयोग, पोलियो विरामीलाई ह्विलचेयर सहयोग, लुम्बिनीमा दिप प्रज्वलन गरिएको जनाए । आफ्नो कार्यकालमा ३३ लाख लगानीमा ३ हजार नागरिक लाभान्वित हुने गरी २५ बढी योजनामा काम गरेको उनले सुनाए । सामूहिक सेवाभावले काम गर्दा सफलता मिलेको उनले सुनाए ।

कार्यक्रममा पूर्वअध्यक्ष कृष्णप्रसाद पाण्डे, कार्यक्रम संयोजक प्रेम शर्मा लोहनी लगायतले बोल्दै सेवा भावलाई आगमी दिनमा अझै प्रभावकारी बनाउने प्रतिबद्धता जनाए । सो अवसरमा विभिन्न कार्यक्रममा संयोजकको भूमिका खेल्ने क्लब सदस्यहरुलाई सम्मान समेत गरिएको थियो ।