दुई पाकिस्तानीबाट १७ हजार अमेरिकी डलर बरामद

Advertisement

भैरहवा– कपिलवस्तुका दुई स्थानमा सुनका गहना चोरी आरोपमा पक्राउ परेका दुई पाकिस्तानी महिलाका श्रीमानबाट विदेशी मुद्रा बरामद भएको छ । गहना चोरी आरोपमा पाकिस्तानी नागरिक २० वर्षीया वेबी कलसुम र ४१ वर्षीया सर्वना पक्राउ परेका थिए । श्रीमती पक्राउ परेपछि नेपाल छाडेर भाग्न खोजेका पाकिस्तानी नागरिक २३ वर्षीय इर्फान अली र ४४ वर्षीय सफीउर रहमानबाट १७ हजार १३६ अमेरिकी डलर बरामद भएको छ । उनीहरु शनिबार काठमाडौंस्थित त्रिभुवन अन्तर्राष्ट्रिय विमानस्थलबाट पक्राउ परेका थिए ।

Advertisement

ती पुरुसबाट साउदी रियाल ३२५, बंगलादेशी टाका एक हजार ६१५, युएई दिराम ५ र मलेसियन रिंगेट १८५ समेत बरामद भएको जिल्ला प्रहरी कार्यालय कपिलवस्तुका प्रहरी प्रवक्ता डिएसपी रिपेन्द्रकुमार सिंहले बताए । ‘उनीहरूमाथि अनुसन्धान भइरहेको छ । प्रष्ट हिन्दी बोल्ने भएकाले संवाद सहज भएको छ,’ डिएसपी सिंहले भने, ‘तर, धेरै बोल्न मानेका छैनन् ।’

विस्तारै थप कुरा खुल्दै जाने उनले बताए । अनुसन्धानका क्रममा सुन चोरीमा उनीहरूको पनि संलग्नता देखिएको छ । श्रीमतीहरूलाई पसलमा सुन चोरी र ठगी गर्न पठाउने र बाहिर बसेर उनीहरू ‘वाच’ गर्ने गरेको प्रहरीको भनाइ छ । कतिपय अवस्थामा सुन चोरेर बाहिरीना साथ भाडाको जीप कारबाट भाग्न सहयोग गरेको पाइएको प्रहरीले जनाएको छ ।

श्रीमती पक्राउ परेपछि दुवैजना त्रिभुवन अन्तर्राष्ट्रिय विमानस्थलबाट सुरक्षा चेकजाँच गराई बोर्डिङ पास लिएर विमानतर्फ जाँदै गर्दा पक्राउ परेका हुन् । उनीहरू एयर अरेबियाको विमानमार्फत नेपाल छाड्न लाग्दा गत शनिबार साँझ पक्राउ परेका थिए । प्रहरीले दुवैलाई सोमबार ८ दिनको म्याद लिएर अनुसन्धान गरिरेहको छ । उनीहरू चारैजना प्रहरी अनुसन्धानमा छन् । वेबी कलसुमका श्रीमान इर्फान अली हुन् । सर्वनाका श्रीमान सफीउर रहमान हुन् । सफीउर रहमान तेस्रोपटक नेपाल आएका हुन् । इर्फान अली भने पहिलोपटक नेपाल आएका हुन् ।

दुई महिलाले शिवराज नगरपालिका–५, चन्द्रौटास्थित सुरेन्द्र सुनचाँदी पसलमा सुन गरगहना खरिद गर्ने भन्दै गहना हेर्दै व्यवसायीलाई अल्मल्याई ३८ लालको एक जोडा सुनको झुम्का चोरेर भागेका थिए । त्यसअघि सदरमुकाम तौलिहवास्थित बागेश्वरी ज्वेलर्स सुनचाँदी पसलमा ती महिलाले ठगी गरेर भागेका थिए । महिला र पुरुष २४ मार्चमा काठमाडौं आएका थिए । २२ अप्रिलसम्म उनीहरूको भिसा म्याद छ ।