न्यायको अन्तिम ढोका सर्वोच्च अदालत आगजनीले ध्वस्त, मुद्दाको पेसी अनिश्चितकालका लागि स्थगित

भैरहवा– मुलुकको न्यायिक निकाय सर्वोच्च अदालत जेनजी आन्दोलनका नाममा भएको तोडफोड र आगजनीले तहसनहस भएको छ । न्यायको अन्तिम ढोका समेत रहेको अदालतमा करिब ६० हजार मुद्दाका फाइलहरु जलेर नष्ट भएका छन् । न्यायिक निकायको सार्वेच्च थलो नै तहसनहस भएपछि अदालत पेसीमा रहेका मुद्दाहरुको सुनुवाइ अनिश्चितकालका लागि स्थगित गरेको छ ।

Advertisement

जेनजी युवाको प्रदर्शनको क्रममा मंगलबार सर्वोच्च अदालत पूर्णरुपमा जलेर ध्वस्त भएको छ । सर्वोच्च अदालतका मुख्य रजिष्ट्रारबाट आज बिहान जारी सूचनामा लेखिएको छ, ‘मुद्दाका मिसिल, सर्भर, इजलास समेत जलेर नष्ट भएको हुँदा आजको लागि तोकिएका मुद्दाको पेसी स्थगित गरिएको भोलिदेखिका पेसीमा रहेका मुद्दाहरुको सुनुवाइ अर्को सूचना नभएसम्मका लागि स्थगित गरिएको‘।’

सर्वोच्च अदालतले हेटौंडास्थित डाटा सेन्टरमा आफ्नो डाटाको ब्याकअप राखेको थियो, त्यहाँ समेत तोडफोड र आगजनी भएको छ । दुवैतर्फ आक्रमण भएपछि अहिले सर्वोच्च अदालतको वेवसाईट ‘डाउन’ छ । सफ्टवेयरबाट मुद्दाहरु अघि बढाउने अवस्था छैन । सर्वोच्च अदालतले मुद्दाका सबै प्रक्रियासम्बन्धी विवरण अनलाइनबाट चलाउँथ्यो । पछिल्ला वर्षमा मुद्दाका फाइलहरु डिजिटल रुपमा तयार गर्ने क्रम बढेपनि पुराना मुद्दाहरु भने कागजातविना सुनुवाइ गर्न सम्भव हुँदैन ।

अभिलेख जलेपछि सबै प्रमाण नष्ट भएका छन्, ती मुद्दामा के गर्ने भन्ने अन्यौल छ । न्यायाधीशहरुले तयार पारेका कैयौ फैसलाको अभिलेख कम्प्यूटरसँगै जलेर नष्ट भएका छन् । आगजनीका कारण सर्वोच्च अदालत पूर्णरुपमा क्षतिग्रस्त भएकाले सुनुवाइहरु अनिश्चितकालका लागि स्थगित गरिएको हो । डिजिटल रुपान्तरणमा उदाहरणिय काम गरिरहेको विशेष अदालत पनि आगजनीबाट क्षति पुगेको छ ।