पक्की पुल निर्माणपछि वर्षामा पनि यात्रा सहज

पब्लिक कुरा
२०८२ आश्विन २३

515 Share

गुल्मी– गुल्मीको तम्घासदेखि सिमलटारीसम्मको मदन भण्डारी राजमार्ग अन्तर्गत चार स्थानमा पक्की पुल निर्माण कार्य सम्पन्न भएको छ । पुल निर्माणपछि वर्षातको समयमा पनि सवारी आवागमन सहज भएको छ । ६ वर्षअघि कालोपत्र गरिएको राजमार्गको हुलाके, धनार्जी, फूलबारी र घमिरका खहरे खोलामा पुलको अभावमा सवारी साधन र पैदल यात्रुलाई समस्या हुने गथ्र्यो ।

प्रत्येक वर्षातमा खोलामा पानी बढ्दा यात्रुलाई जोखिमपूर्ण यात्रा गर्नु पर्ने अवस्था थियो । तर, हालै पक्की पुल निर्माणसँगै सवारी साधन अवरोधविना आवत–जावत गर्न थालेका छन । यस वर्षको वर्षातमा पनि सवारीसाधन नियमित रूपमा चलिरहेका छन । जसले स्थानीयवासी तथा यात्रुलाई ठूलो सहजता प्रदान गरेको छ । पुल निर्माणले पश्चिम गुल्मीका बासिन्दाको दैनिक जीवनमा सकारात्मक प्रभाव पारेको छ ।

पक्की पुलले दुर्गम मानिएको पश्चिम भेगको यात्रालाई सुगम तुल्याएको मालिका–६ का स्थानीय ओमबहादुर कार्कीले जनाए । ४ वटा पुल मध्ये फूलबारी र घमिर खोलामा पुल निर्माणका लागि पन्त निर्माण सेवाले काम गरेको हो । हुलाके र धनार्जी खोलामा पुल निर्माणका लागि सुनिल समीर निर्माण सेवा प्रालि तम्घास गुल्मीले काम गरेको थियो ।

पक्की पुल नबन्दा वर्षातको समयमा पश्चिम गुल्मीका कैयौं नागरिक बिरामी पर्दा समेत खोला किनारमै बसेर खोला घटेपछि तर्नुपर्ने बाध्यता थियो । अब भने त्यो अवस्थाको अन्त्य भएको मालिका–६ का पूर्ववडाध्यक्ष एवं स्थानीय शोभाखर गिरीले जनाए ।

अब पुल निर्माण पछि यहाँका नागरिकमा खुसियाली थपिएको उनको भनाई छ । घमिर खोलमा १५ मिटर लम्बाइको पुल निर्माणको लागि ३ करोड १३ लाख ८४ हजारको लागत रहेको मदन भण्डारी राजमार्ग आयोजना गुल्मीले जनाएको छ । फूलबारी खोलामा २० मिटर लम्बाइको पुल निर्माणका लागि ३ करोड ३२ लाख ६८ हजार लागत लागेको छ । धनार्जी रोधी खोलामा बनेको ३५ मिटर लम्बाइको पुल निर्माणका लागि ७ करोड ४८ हजार र हुलाके खोलामा २५ मिटर लम्बाइको पुल निर्माणका लागि ५ करोड ७९ लाख ५३ हजारको लागत लागेको छ ।