लुम्बिनीमा दुई वर्ष पूरा गरेका वन कर्मचारीको एकैपटक सरूवा

Advertisement

भैरहवा– लुम्बिनी प्रदेश सरकार अन्तर्गत वन तथा वातावरण मन्त्रालयले एउटै कार्यालयमा दुई वर्ष पूरा गरेका कर्मचारीको सरुवा गरेको छ । लामो समयदेखि एउटै कार्यालयमा बिताएका कर्मचारीलाई वन मन्त्रालयले सरुवा गरेको हो ।

Advertisement

वन मन्त्रालयका अनुसार गत साता १५७ जना कर्मचारीको सरूवा गरिएको हो । मन्त्रालयले नयाँ आर्थिक वर्ष लागेपछि नियमित भन्दै एकैपटक १५७ जना वन कर्मचारीको सरूवा गरेको जनाएको छ । मन्त्रालयद्वारा सार्वजनिक सूचीमा दुई वर्षभन्दा बढी अवधि एउटै कार्यालयमा बिताएका अधिकृतदेखि रेन्जरहरुको सरुवा गरिएको हो ।

वन तथा वातावरणमन्त्री बादशाह कुर्मीले एउटै कार्यालयमा लामो समय बिताउँदा कर्मचारीको कामको प्रभावकारितामा असर पुग्ने र समस्याहरु सिर्जना हुने भएकाले सरुवाको निर्णय गरिएको जनाए । प्रदेश वन सेवा सहायक तृतीयदेखि अधिकृत आठौं तहसम्मका कर्मचारीको सरूवा गरिएको हो । दोस्रो चरणमा वन रक्षक तहसम्मै यसप्रकारको सरुवा गर्ने तयारी रहेको मन्त्री कुर्मीले जनाएका छन् ।

गतवर्ष मन्त्रालयले एउटै स्थानमा ७ वर्षभन्दा बढी समय काम गरेका कर्मचारीको सरुवा गरेको थियो । वन प्रशासनलाई चुस्त र प्रभावकारी तुल्याउन मन्त्रालयले पहिलोपटक यस्तो निर्णय गरेको मन्त्रालयका एक अधिकृतले जानकारी दिए । लुम्बिनी प्रदेशमा अहिलेसम्म दुई वर्ष सेवा हद कुनै मन्त्रालयले लागू गर्न नसकेको अवस्थामा वन मन्त्रालयले यस्तो निर्णय कार्यान्वयन गरेको हो ।

कर्मचारीको सरुवा व्यवस्थाका लागि ऐनमै उक्त व्यवस्था समेटिएको भएपनि पहिलोपटक वन मन्त्रालयले कार्यान्वयन गरेको हो । सरोकारवालाले सुशासन र चुस्त प्रशासनका लागि वन मन्त्रालयले गरेको यो निर्णय प्रशंसनीय रहेको प्रतिक्रिया दिएका छन् । मन्त्रालयले गरेको सुधारात्मक कदम रोक्न केही कर्मचारीले लबिङ सुरु गरेको उक्त मन्त्रालय स्रोतले बतायो ।