एमाले महाधिवेशन निभ्ने बेलाको वत्ति : डा.भट्टराई

पब्लिक कुरा
२०७८ मंसिर १२

257 Share

बुटवल– जनता समाजवादी पार्टीका संघीय परिषद् अध्यक्ष डा. बाबुराम भट्टराईले मुलुकमा राजनीतिक क्रान्ति भएर व्यवस्था परिवर्तन भए पनि आम जनताको आर्थिक, सामाजिक स्तरमा खासै परिवर्तन आउन नसकेको बताएका छन् ।

आइतबार बुटवलमा सञ्चारकर्मीहरूसँग कुरा गर्दै पूर्वप्रधानमन्त्री समेत रहेका डा.भट्टराईले भने, ‘जसले गर्दा जनतामा निराशा र अन्योलता छाएको छ । अब, देशमा नयाँ वैकल्पिक शक्ति चाहिएको छ ।’ उनले देशले नयाँ राजनीतिक ध्रुवीकरण र उथलपुथल माग गरेको बताएका छन् ।

माओवादी केन्द्र, एकीकृत समाजवादी र जसपा लगायतका पार्टीहरूबीच ध्रुवीकरण गरेर वैकल्पिक पार्टी बनाउनुपर्नेमा उनले जोड दिए । नेकपा एमाले अग्रगमनको वाधक र नवफासीवादी शक्ति भएको उनको दाबी छ । उनले एमालेको महाधिवेशनको तडकभडक निभ्ने बेलाको वत्ति जस्तै भएको टिप्पणी गरे ।

सरकारको नेतृत्व गरिरहेको नेपाली कांग्रेसबाट रुपान्तरणकारी परिवर्तनको अपेक्षा गर्न नसकिने भट्टराईले बताए । यद्यपि आगामी चुनावसम्म अहिलेको सत्ता गठबन्धन कायम राख्नुपर्ने बताए ।