इप्रका मझगाँवाद्वारा ५ लाख ३५ हजारका अवैध डिजेका सामान बरामद

पब्लिक कुरा
२०८२ चैत्र २३

5400 Share

भैरहवा– रुपन्देहीको कोटहीमाई गाउँपालिका–३, त्रिलोकपुर क्षेत्रबाट प्रहरीले अवैध रूपमा भन्सार छली गरी ल्याइएको लाखौँ मूल्य बराबरको विद्युतीय सामग्री बरामद गरेको छ । इलाका प्रहरी कार्यालय, मझगाँवाका प्रहरी सहायक निरीक्षक बिष्णुबहादुर थापाको नेतृत्वमा खटिएको गस्ती टोलीले सोमबार उक्त सामान बरामद गरेको हो ।

प्रहरीले भारतबाट नेपालतर्फ लुकाइछिपाइ ल्याउँदै गरेको डिजे प्लस स्पिकर ४ थान, डिजे लाइट ८ थान र लेजर राय स्ट्रिम ५० थान बरामद गरेको हो । बरामद सामग्रीको अनुमानित मूल्य ५ लाख ३५ हजार बराबर रहेको प्रहरीले जनाएको छ ।

प्रहरी टोलीलाई देख्नासाथ सामान ल्याएर आएका व्यक्तिहरू सामान छाडेर फरार भएका थिए । बरामद गरिएको सामग्री आवश्यक कारबाहीका लागि सम्बन्धित निकायमा पठाइएको छ ।