राजनीतिक दल तथा उम्मेदवारलाई निर्बाचन आयोगको ६४ बुँदे निर्देशन

Advertisement

भैरहवा–फागुन २१ गते हुने प्रतिनिधि सभाको निर्वाचन प्रति केन्द्रित रहदै निर्वाचन आयोगले राजनीतिक दल तथा उम्म्ेदवारहरुलाई ६४ बुँदे निर्देशन जारी गरेको छ । निर्बाचन आचारसंहिताको पूर्ण पालना गर्ने तर्फ ध्यानाकर्षण हुने गरि आयोगले आइतवार राजनीतिक दल तथा उम्मेदवारहरुलाइ निर्देशन सहितको प्रेस बिज्ञप्ती जारी गरेको हो ।

Advertisement

दलहरुले मतदातालाई कुनै किसीमको लोभ लालच, आर्थिक प्रलोभन, डर धाक धम्की, धर्म भकाउने तथा प्रतिज्ञा गराउने, सामाजिक बहिष्कार गर्ने तथा सामाजिक प्रतिष्ठामा आँच पुर्याउने जस्ता कार्य नगर्न अनुरोध गरिएको छ । कुनैपनि उम्मेदवार तथा परिवारको चरित्रमा आँच पुग्ने खालको अभिव्यक्ति तथा गतिबिधि नगर्न सचेत गराइएको छ ।

उम्मेदवारहरूले फागुन ४ गतेदेखि फागुन १८ गतेसम्म मात्र जुलुस, आमसभा, कोणसभा र घरदैलो गर्न पाउने, प्रचारप्रसारका कार्यक्रम बिहान ७ बजेदेखि साँझ ७ बजेसम्म मात्र गर्न मिल्ने उल्लेख छ ।

मतदान हुनुभन्दा ४८ घण्टा अघिदेखि मतगणना पूरा नभएसम्म कुनै पनि प्रकारको प्रचारप्रसार गर्न निषेध गरिएको छ । निर्वाचनसम्बन्धी खर्च गर्दा अनिवार्य रूपमा बैङ्क वा वित्तीय संस्था मार्फत गर्नुपर्ने र २५ हजार रुपैयाँभन्दा धेरै आर्थिक सहयोग लिँदा बैङ्क खातामार्फत मात्र लिनुपर्ने भनिएको छ ।

दल तथा उम्मेदवारले निर्वाचन परिणाम घोषणा भएको ३५ दिनभित्र खर्चको पूर्ण विवरण आयोगमा बुझाउनुपर्ने छ । टिसर्ट, टोपी, झोला, मास्क वा लकेटजस्ता निर्वाचन चिन्ह अङ्कित सामग्री वितरण र प्रयोग गर्न नमिल्ने, ७५ ग्रामको कागजमा ३०० वर्ग इन्चसम्मको एउटै रङ्गको पर्चा मात्र वितरण गर्न पाइने, डिजिटल बोर्ड, फ्लेक्स र भित्ते लेखन पूर्ण रुपमा निषेध गरिएको छ । निर्वाचन अधिकृतको अनुमति लिएर बढीमा दुईवटा सवारी साधन मात्र प्रयोग गर्न पाइनेछ । सरकारी सवारी साधनको प्रयोगमा पूर्ण प्रतिबन्ध लगाइएको छ ।

निर्वाचनका कुनै पनि कार्यक्रममा बालबालिकालाई प्रयोग गर्न रोक लगाइएको छ । निर्वाचन कार्यक्रममा प्लास्टिक वा पोलिथिनजस्ता सामग्रीको प्रयोग गर्नपनि रोकिएको छ । निर्वाचनका वेला प्रयोग भएका प्रचार सामग्रीको उचित व्यवस्थापन सम्बन्धित दल तथा उम्मेदवारले नै गर्नुपर्ने वारे सचेत बनाइएको छ । बहुदलिय सङ्घीय लोकतान्त्रिक गणतान्त्रिक शासन व्यवस्थामा आँच पुर्याउने, कुनै जात, बर्ग वा सम्प्रदायबीचको सम्बनधमा खलल पुर्याउने गतिबिधि गर्न पाइनेछैन ।

निर्बाचन प्रचारप्रसारका क्रममा सरकारी तथा सार्वजनिक सम्पत्तिको प्रयोग गर्न पाइने छैन । एक दल वा उम्मेदवारले प्रयोग गर्न अनुमती लिएको सवारी साधन अर्को दल वा उम्मेदवारले प्रयोग गर्न नपाइने लगायतका बिषयमा आयोगले ध्यानाकर्षण गराएको छ ।