कुष्ठरोग निवारण घोषणा भएको पाल्पामा हरेक बर्ष भेटिन्छन् बिरामी

पब्लिक कुरा
२०८२ माघ १३

664 Share

भैरहवा–१६ वर्षअघि कुष्ठरोग निवारण जिल्ला घोषणा गरिएको पाल्पा जिल्लामा हरेक वर्ष कुष्ठरोगका बिरामी भेटिने गरेका छन् । २०६६ साल माघ ५ गते पाल्पालाई कुष्ठरोग निवारण जिल्ला भनेर घोषणा गरिएको थियो ।

स्वास्थ्य कार्यालय पाल्पाका अनुसार अघिल्लो आर्थिक वर्षमा पाल्पाको तानसेन नगरपालिकामा ४ जना, रैनादेवी छहरा गाउँपालिकामा १, माथागढी गाउँपालिकामा १, निस्दी गाउँपालिकामा ३, पूर्वखोला गाउँपालिकामा १, रामपुर नगरपालिकामा ५, तिनाउ गाउँपालिकामा ३ जना गरी १८ जना कुष्ठरोगी फेला परेका थिए ।

चालु आर्थिक वर्षको ६ महिनामा रामपुरमा २, पूर्वखोलामा १, बगनासकालीमा १, रैनादेवी छहरामा १, तिनाउमा १ र निस्दीमा २ जना फेला परेका छन् । स्वास्थ्य कार्यालय र स्थानीय तहले सक्रिय बिरामीको खोजपहिचान, कुष्ठरोग रोकथाम कार्यक्रम, जनचेतनामूलक तथा क्षमता अभिवृद्धि कार्यक्रम गर्दै आएका छन् ।

स्वास्थ्य कार्यालय पाल्पाका निमित्त प्रमुख टुकप्रसाद पोखरेलले अहिलेपनि जिल्लाका सबै पालिकामा बसोवास गर्नेमा कुष्ठरोगको किटाणु रहेको संभावना प्रबल रहेको बताउँछन् । उनका अनुसार, कुष्ठरोग लागेपछि अनुहार र कानका लोतीमा गिर्खा देखिनु, छाला चम्किलो र बाक्लो हुनु तथा आँखीभौं झर्नु, हातखुट्टा लगातार झमझम गर्नु, स्नायु सुन्निनु, दुख्नु, हातखुट्टा छुँदा थाहा नहुनु, मांसपेशीहरू कमजोर हुनु जस्ता लक्षण देखिन्छ ।

अझै पनि कुष्ठरोगका कारण हुने अपांगता दर उच्च रहेको छ भने स्थानीय संक्रमणदरमा कमी आएको छैन । स्वास्थ्य कार्यालयका अधिकृत विश्वनाथ न्यौपाने कुष्ठरोगप्रति सामाजिक भेदभाव विद्यमान रहेको बताउँछन । भेदभाव र लाञ्छनाका कारण कुष्ठरोगीहरु समाजमा खुल्न नसक्दा समस्या जटिल बन्ने गरेको भनाइ उनको छ ।