युवाहरूको आवाजले मलाई अर्को बाटो अपनाउन बाध्य बनायोः नेता गुप्ता

Advertisement

कपिलवस्तु– एमाले नेता तथा पूर्वप्रतिनिधि सभा सदस्य बृजेशकुमार गुप्ताले आफूले एमाले छाडिसकेको जनाएका छन् । सोमबार सामाजिक संजाल फेसबुकमा लामो स्टाटस लेख्दै उनले सो कुरा उल्लेख गरेका हुन् ।

Advertisement

‘विगत केही दिनयता सामाजिक सञ्जालमा मेरो बारेमा उठेका विभिन्न विचारहरू, सकारात्मक होस् वा नकारात्मक, म सबैलाई हृदयदेखि नै नियालिरहेको छु । ती सबैमा मलाई लिएर जिज्ञासा, चिन्ता, आशा र कहिलेकाहीँ निराशासमेत मिसिएको पाएको छु । यो देख्दा मेरो मन अमिलिन्छ, तर साथै गर्व पनि लाग्छ किनकि यो सबै तपाईंहरूको माया र अपेक्षाको प्रमाण हो’, उनले भनेका छन्, ‘म स्पष्ट गर्न चाहन्छु मलाई निर्वाचनमा विजयी बनाउने पनि तपाईंहरू नै हुनुहुन्छ, र पराजित गर्ने पनि तपाईंहरू नै । जनता नै मेरो सबैभन्दा ठूलो शक्ति र मार्गदर्शक हुनुहुन्छ । तपाईंहरू मेरो सोचको आधार, मेरो आदर्शको स्रोत, मेरो दुःख–सुखको साझेदार हुनुहुन्छ । तपाईंहरूले जे चाहनुहुन्छ, म त्यही गर्न तयार छु किनकि मेरो जीवनको हरेक पाइला तपाईंहरूकै लागि हो ।’

उनले आफू विगतमा एउटा साधारण इन्जिनियर भएको सम्झिएका छन् । ‘यो राजनीतिक यात्रामा मलाई ल्याउने काम पनि यिनै मेरो प्यारा क्षेत्रवासीहरूले गर्नुभयो । तपाईंहरूको विश्वास र उत्साहले नै मलाई यो बाटोमा डोर्यायो । अब मेरो सम्पूर्ण जीवन तपाईंहरूको सेवा र समर्पणमा नै अर्पित छ । यो कुरा म हृदयबाट भन्छु तपाईंहरू बिना म केही पनि होइनँ,’ उनले भनेका छन्, ‘हो, ममा पनि मान्छे भएर केही कमी–कमजोरी अवश्य होलान् । तिनै कमजोरीहरूले गर्दा यसपटक तपाईंहरूले मलाई प्रतिनिधि सभा सदस्यको रूपमा योग्य ठान्नु भएन । यदि तपाईंहरूको मनमा म अब राजनीतिबाट सन्यास लिनुपर्छ भन्ने भावना छ भने, मलाई त्यो पनि स्वीकार्य छ । खुसी–खुसी म पछाडि हट्न तयार छु ।’

तर यो कुरा कहिल्यै नबिर्सनुहोस् मसँग सपना छ, जीवन छ । ‘हरेक पढेलेखेका व्यक्तिमा जस्तै ममा पनि देश र समाजलाई राम्रो बनाउने सोच र योजना प्रशस्त छन् । केवल सही अवसर र परिस्थिति नमिलेका कारण ती सपनाहरू अझै पूर्ण रूपमा फल्न सकेका छैनन्’, उनले भनेका छन्, ‘देशमा घटेका विभिन्न घटनाक्रमहरूले मेरो मनलाई गहिरो रूपमा छोयो । जेनजीका युवा साथीहरूको अनुरोधले मलाई नयाँ जिम्मेवारीको बोध गरायो । तिनै घटना र तिनै युवाहरूको आवाजले मलाई अर्को बाटो अपनाउन बाध्य बनायो । म त्यो बाटोमा हिँडिरहेको छु र सधैँ हिँडिरहनेछु किनकि मैले सबैको सम्मान गर्न सिकेको छु, सबैको भावनालाई आत्मसात् गर्न सिकेको छु ।’

उनले आमजनताको माया र साथ सधैँ आफ्ना लागि सबैभन्दा ठूलो सम्पत्ति भएको जनाएका छन् । ‘यदि म फेरि अवसर पाएँ भने पूर्ण मनले सेवा गर्नेछु । यदि नपाएँ भने पनि तपाईंहरूको सुख–शान्तिको कामना गर्दै शान्तिसँग बस्नेछु’, उनले भनेका छन् ।