सिद्धार्थनगर सिटी अस्पतालमा सुरु भयो आमा सुरक्षा कार्यक्रम

Advertisement

भैरहवा– निजी क्षेत्रबाट संचालित रुपन्देहीको ठूला अस्पतालमध्येको एक भैरहवास्थित सिद्धार्थनगर सिटी हस्पिटल प्रालिमा नेपाल सरकारको ‘आमा सुरक्षा कार्यक्रम’ सुरु भएको छ । निजी क्षेत्रबाट सञ्चालित अस्पतालमा समेत सुरक्षित मातृत्व सेवा विस्तार गर्ने उद्देश्यले आइतबारदेखि उक्त हस्पिटलमा कार्यक्रम कार्यान्वयनमा ल्याइएको हो ।

Advertisement

आमा सुरक्षा कार्यक्रमअन्तर्गत अस्पतालबाट सामान्य प्रसूति, जटिल प्रसूति तथा सिजेरियन (शल्यक्रिया) सेवा निःशुल्क उपलब्ध हुने अस्पतालका प्रबन्ध निर्देशक अर्जुन पौडेलले जानकारी दिए । ‘सुत्केरी आमालाई यातायात खर्चबापत १ हजार रुपैयाँ तथा कम्तीमा चार पटक गर्भ जाँच (एएनसी) गराएका महिलालाई ८ सय रुपैयाँ प्रोत्साहन रकम उपलब्ध गराइनेछ’, उनले भने ।

पौडेलले दक्ष स्वास्थ्यकर्मीमार्फत छिटो, सहज र गुणस्तरीय प्रसूति सेवा उपलब्ध गराउने प्रतिबद्धता व्यक्त गरे । ‘सर्वसुलभ र सहज सेवाकै कारण यहाँ धेरै विरामीले उपचार गर्न चाहनुहुन्छ’, उनले भने, ‘आमा सुरक्षा कार्यक्रम लागूपछि आमनागरिकको भरोसा अझ थप भएको मैले विश्वास लिएको छु ।’

अस्पतालजन्य संक्रमण नियन्त्रण, सरसफाइ र सुरक्षित वातावरणलाई विशेष प्राथमिकतामा राखिने सेवा उपलब्ध गराउँदै बताउँदै पौडेलले यसलाई अझ व्यवस्थित गरिने जनाए । यो अस्पताल पछिल्लो समय स्वदेशी तथा विदेशी विरामीको भरपर्दो रोजाइ बनिरहेको छ ।

ए सय शय्यामा सञ्चालन भइरहेको अस्पतालले प्रसूति तथा स्त्रीरोग सेवासहित विभिन्न विशेषज्ञ स्वास्थ्य सेवा प्रदान गर्दै आएको छ । आमा सुरक्षा कार्यक्रम लागू भएसँगै आर्थिक अवस्थाका कारण सुरक्षित प्रसूति सेवाबाट वञ्चित हुन सक्ने महिलालाई समेत सहज रुपमा सेवा लिन थप सहयोग पुग्ने अस्पतालको अपेक्षा छ ।

अस्पतालका अध्यक्ष सुरज उप्रेतीले सुत्केरीपछिको अत्यधिक रक्तस्राव (पीपीएच) लगायत प्रसूतिसँग जोडिएका जोखिम न्यूनीकरणमा विशेष ध्यान दिई सेवा संचालनमा आफूहरु प्रतिबद्ध रहेको जनाए । ‘आमा सुरक्षा कार्यक्रमअन्तर्गत उपलब्ध सेवा तथा लागतसम्बन्धी दरलाई समयअनुकूल पुनरावलोकन गर्नुपर्ने देखिन्छ । यसमा हाम्रोतर्फबाट सबै पहल हुनेछन्’, उनले भने ।

कार्यक्रमको शुभारम्भ गर्दै प्रतिनिधि सभा सदस्य ज्ञानु आमा सुरक्षा कार्यक्रम सञ्चालन हुनु मातृ तथा शिशु स्वास्थ्य सेवाको पहुँच विस्तारका लागि महत्वपूर्ण कदम भएको बताइन् ।