सिद्धार्थनगर सभापतिमा देवराज न्यौपानेको प्यानलै विजयी

पब्लिक कुरा
२०८३ आश्विन ८

1330 Share

भैरहवा– नेपाली काँग्रेसको १५ औं महाधिवेशन अन्तर्गत बुधबार राति सम्पन्न सिद्धार्थनगर नगरपालिका नगर कार्यसमितिको निर्वाचनमा देवराज न्यौपानेको प्यानल बिजयी भएको छ । यसअघि कार्यबाहक सभापति रहेका न्यौपाने सभापतिमा बिजयी भएका हुन् । न्यौपाने र उनका प्रतिस्पर्धी सञ्जिव शर्मा रेग्मीबीच मत गणनाको अन्तिमसम्म कडा टक्कर भएको थियो ।

न्यौपानेले रेग्मीलाई थोरै मतान्तरले पराजित गरेका हुन् । कुल ३ सय १८ सदर मतमा न्यौपानेले १ सय ५९ मत प्राप्त गरेका थिए । रेग्मीले १ सय ५० मत प्राप्त गरेका हुन् । नगर कार्यसमितिको नेतृत्वका लागि न्यौपाने र रेग्मीले छुट्टाछुट्टै प्यानल बनाएर उम्मेदवारी दिएका थिए । न्यौपानेलाई जिल्ला सभापति रामकृष्ण खाणको समर्थन थियो । भने रेग्मीलाई केन्द्रिय सदस्य भरतकुमार शाहको समर्थन रहेको थियो ।

न्यौपानेको प्यानलबाट उपसभापतिमा गौरव श्रेष्ठ, महिला उपसभापतिमा निलु श्रीस मगर, सचिवमा धर्मबीर शर्मा र सह–सचिवमा दिनेश केवट निर्वाचित भएका हुन् । श्रेष्ठले १ सय ७४, मगरले १ सय ६२, शर्माले १ सय ६७ र केवटले १ सय ६५ मत प्राप्त गरेका थिए । रेग्मीको प्यानलबाट उपसभापति उम्मेदवार अनिल केसीले १ सय ३२, उपसभापति (महिला) लक्ष्मी अर्यालले १ सय ४६, सचिव पंकज उदासले १ सय ४०, सह–सचिव राममिलन यादवले १ सय ३९ मत प्राप्त गरेका थिए ।

सदस्य (खुल्ला) तर्फ सिद्धार्थनगर–१ बाट माधव शर्मा १ सय ६७ मतका साथ विजयी हुँदा उनका प्रतिष्पर्धी खगनाथ गैरैले १ सय ३० मत प्राप्त गरेका थिए । सदस्य महिला (तर्फ) सिद्धार्थनगर–६ बाट सीतादेवी थारु १ सय ६० मतसहित विजयी हुँदा उनकी प्रतिष्पर्धी उर्मिला कुमारी शर्माले १ सय ३६ मत प्राप्त गरेका थिए । अन्य वडाबाट सदस्य, युवा तथा दलिततर्फ सदस्यका उम्मेदवारहरु निर्विरोध निर्वाचित भएका थिए ।