कोहलपुरमा अनलाइन सट्टेबाजीको आरोपमा ४२ जना पक्राउ

Advertisement

नेपालगन्ज–बाँकेको कोहलपुर नगरपालिका–११ स्थित होटल म्याक्समा प्रहरीले छापा मारेर अनलाइन जुवा तथा सट्टेबाजीमा संलग्न रहेको आरोपमा ४२ जनालाई पक्राउ गरेको छ । पक्राउ पर्नेमा ४० जना भारतीय नागरिक र दुई जना नेपाली नागरिक छन् ।

Advertisement

जिल्ला प्रहरी कार्यालय बाँकेका सूचना अधिकारी प्रहरी नायव उपरीक्षक प्रतित सिंह राठौरका अनुसार मंगलबार राति करिब ८ बजे होटलमा अनलाइन जुवा खेलाउने कार्य भइरहेको सूचनाका आधारमा प्रहरी टोलीले छापा मारेको हो ।

पक्राउ परेकाहरूको साथबाट २८ वटा ल्यापटप र ७८ वटा मोबाइल फोन बरामद गरेको उनले जनाए । होटलबाट अन्य विद्युतीय उपकरणसमेत बरामद गरिएको र ती सामग्रीमाथि थप अनुसन्धान भइरहेको प्रहरीले जनाएको छ ।

प्रारम्भिक अनुसन्धानबाट पक्राउ परेकाहरू अनलाइन सट्टेबाजीसँग सम्बन्धित गतिविधिमा संलग्न रहेको खुलेको प्रहरीको भनाइ छ । यद्यपि उनीहरूको बिगतको पृष्ठभूमि लगायत विषयमा विस्तृत अनुसन्धान प्रहरीले गरिरहेको छ ।

राठौरले घटनासम्बन्धी थप विवरण अनुसन्धानपछि मात्रै सार्वजनिक गर्न सकिने बताएका छन् । बरामद भएका विद्युतीय उपकरणको समेत सूक्ष्म रूपमा अनुसन्धान भइरहेको छ । पछिल्लो समय सामाजिक सञ्जालमार्फत अनलाइन जुवा तथा सट्टेबाजीको प्रचारप्रसार बढ्दै गएको र प्रहरीले यस्ता गतिविधिमाथि निगरानी बढाएको उनले बताए ।