मानसिक उपचारका लागि ‘क्लिनिक’ सञ्चालनमा

पब्लिक कुरा
२०८३ आश्विन २

1400 Share

भैरहवा—मानसिक स्वास्थ्यसम्बन्धी समस्याको उपचारका लागि सिद्धार्थनगर नगरपालिका–१२, भैरहवाको कालिकापथमा ‘ब्रेन एन्ड माइन्ड क्लिनिक’ सञ्चालनमा आएको छ। शुक्रबार सिद्धार्थनगर नगरपालिकाका प्रमुख इस्तियाक अहमदले क्लिनिकको उद्घाटन गरे ।

क्लिनिकमा विभिन्न खालका मानसिक स्वास्थ्यसम्बन्धी समस्याको उपचार तथा व्यवस्थापनसँगै मनोपरामर्श सेवा प्रदान गरिने न्युरो तथा मनोचिकित्सक नसिम अकरमले बताए । उनका अनुसार क्लिनिकमा बालबालिका तथा किशोर–किशोरीको मानसिक स्वास्थ्य सेवा, तनाव तथा चिन्ता व्यवस्थापन, ध्यान व्यवस्थापन, नशालु पदार्थको सेवन तथा दुव्र्यसनसम्बन्धी उपचारलगायतका सेवा उपलब्ध हुनेछन् ।

नगरप्रमुख अहमदले मानिसको मस्तिष्क तनावमुक्त र स्वस्थ हुनुपर्ने बताए । मानसिक स्वास्थ्य पनि शारीरिक स्वास्थ्यजत्तिकै महत्वपूर्ण भएकाले मानसिक समस्यालाई लुकाउनुभन्दा समयमै उपचार तथा परामर्श लिनुपर्ने उनको भनाइ थियो ।

क्लिनिकका सञ्चालक रोशन गुप्ताले क्लिनिक सञ्चालनको अवसरमा दुई दिनसम्म सुगर र कोलेस्टेरोलको ल्याब परीक्षण निःशुल्क गरिने जानकारी दिए । मानसिक स्वास्थ्यसम्बन्धी समस्या भएका व्यक्ति तथा बालबालिकालाई आवश्यक परामर्श, उपचार र व्यवस्थापनमा सहयोग पु¥याउने उद्देश्यले क्लिनिक सञ्चालनमा ल्याइएको गुप्ताले बताए ।

पछिल्लो समय मानसिक स्वास्थ्यसम्बन्धी समस्या बढ्दै गइरहेको अवस्थामा स्थानीयस्तरमै विशेषज्ञ सेवा उपलब्ध गराउने उद्देश्यले क्लिनिक सञ्चालनमा ल्याइएको जनाइएको छ ।