पश्चिमी गण्डक नहरमा पानी छाडियो

Advertisement

नवलपरासी– बर्षा लाग्न सुरु भएसंगै धान खेतीका लागि नेपाल–गण्डक पश्चिमी नहरमा पानी छाडिएको छ ।

Advertisement

नारायणी नदीमा रहेको त्रिवेणीस्थित गण्डक बाँधबाट पश्चिम नवलपरासीका विभिन्न क्षेत्रमा सिँचाइका लागि बनाइएको नहरमा गणतन्त्र दिवसको अवसर पारेर बिहीबारदेखि पानी छाडिएको गण्डक नहर व्यवस्थापन कार्यालय नवलपरासीका प्रमुख तिलकराम बुढाथोकीले बताए । उनका अनुसार, अघिल्लो वर्षको तुलनामा यस वर्ष एक साताअघि नै नहरमा पानी छाडिएको हो ।

त्रिवेणीस्थित नहरको मुखमा बालुवा थिग्राउने पोखरी निर्माण गरिएपछि नहरमा बालुवा पस्ने समस्या कम भएकाले सहज रूपमा पानी प्रवाह भएको उनले जनाए । नहरमा बगेर आउने बालुवा थिग्रिएर साँघुरो बनेको नहर यस वर्ष पनि सफाइ गरिएको छ । नहरमा पानीसंगै बगेर आउने बालुवाले किसानको खेतमा समेत जमेर सिंचाइ गर्न समस्या हुने गर्दथ्यो ।

झन्डै ९ करोड रुपैयाँ लागतमा नहर सफाइ तथा मर्मतसम्भार गरी यस बर्षको सिंचाइका लागि नहर तयार पारिएको हो ।

गण्डक बाँधबाट ३२ किलोमिटर लम्बाइ रहेको नहरमार्फत पश्चिम नवलपरासीका ६ वटा स्थानीय तहका करिब ७ हजार हेक्टर क्षेत्रफलमा सिँचाइ हुँदै आएको छ । अझै पनि नहरको मर्मतसम्भार पूर्ण रूपमा सम्पन्न नभएकाले आवश्यकता अनुरुपको पानी आपूर्ति हुन सकेको छैन ।