भारतबाट १५ जना नेपाली बालबालिका पुनर्स्थापनाका लागि नेपाल ल्याइँदै

Advertisement

भैरहवा–भारतका विभिन्न स्थानमा जोखिमपूर्ण अवस्थामा फेला परेका १५ जना नेपाली बालबालिका तथा किशोरकिशोरीलाई उद्धार गरी परिवारमा पुनर्स्थापना गराउन मंगलबार नेपाल ल्याइँदै छ ।

Advertisement

भारतको दिल्लीस्थित मानव बेचबिखन तथा ओसारपसारविरुद्ध कार्यरत संस्था ‘किन इन्डिया’को पहलमा भारतका महाराष्ट्र, दिल्ली र झारखण्डलगायत स्थानबाट फरक–फरक समयमा उद्धार गरिएका उनीहरूलाई परिवार तथा आफन्तको जिम्मा लगाउन नेपाल ल्याउदै गरिएको हो ।

किन इन्डियाका निर्देशक नविन जोशीका अनुसार उद्धार गरिएकामध्ये १२ जना १५ वर्षमुनिका बालबालिका र तीन जना १५ वर्षभन्दा माथिका किशोरकिशोरी छन्। उद्धार गरिएकामध्ये पाँच जना बालिका तथा किशोरी छन् ।

उद्धार गरिएकामध्ये केही बालकलाई मदरसामा पढाउने भन्दै अवैध रूपमा भारत लगिएको पाइएको छ । उनीहरू जोखिमपूर्ण तथा नियमविपरीत अवस्थामा रहेको जानकारी पाएपछि भारतीय प्रहरी, विशेषगरी महाराष्ट्र प्रहरीको सहयोगमा मदरसामा छापा मारेर उद्धार गरिएको जोशीले बताए ।

त्यस्तै, केही बालिका तथा किशोरी घरेलु हिंसाको सामना गर्न नसकेर घरबाट भागेका अवस्थामा भारत पुगेका थिए । उनीहरूलाई पनि भारतका विभिन्न स्थानमा जोखिमपूर्ण अवस्थामा फेला पारेर उद्धार गरिएको हो । केही बालबालिका भने दिल्लीका रेल्वे स्टेशनमा अलपत्र अवस्थामा भेटिएका थिए ।

जोशीका अनुसार भारतका विभिन्न स्थानबाट उद्धार गरिएपछि उनीहरूलाई केही समय ‘किन इन्डिया’को संरक्षणमा राखिएको थियो । अब उनीहरूलाई सुरक्षित रूपमा नेपाल ल्याएर परिवार तथा आफन्तसँग पुनर्मिलन गराउने तयारी गरिएको छ ।

उद्धार गरिएका बालबालिकालाई तीनवटा गाडीमार्फत मंगलबार बिहान दिल्लीबाट नेपाल ल्याइँदै गरिएको जानकारी जोशीले दिए । बालवालिका सहितको दुईवटा गाडी भारतको बरेली हुँदै नेपालगन्ज नाकाबाट रुपन्देहीतर्फ आउने क्रममा छन् भने अर्को गाडी भारतको पटना हुँदै रुपन्देही आइरहेको छ । उनीहरूलाई बुधबार रुपन्देहीमा नेपाल सरकारका प्रतिनिधि तथा आफन्तको उपस्थितिमा हस्तान्तरण गर्ने कार्यक्रम रहेको छ ।

नेपाल ल्याउने क्रममा बालबालिकासँग ‘किन इन्डिया’का कर्मचारी तथा भारतस्थित नेपाली राजदूतावासका वरिष्ठ प्रहरी उपरीक्षक प्रकाश मल्ल समेत रहेका छन् ।

जोशीका अनुसार, उद्धार गरिएका बालबालिका तथा किशोरकिशोरी मधेश प्रदेशसहित पश्चिम नवलपरासीको प्रतापपुर, पाल्पा, कञ्चनपुर, कैलालीलगायत जिल्लाका रहेका छन् । उनीहरू सबैलाई विभिन्न माध्यमबाट अवैध रूपमा भारत पुर्याइएको  र त्यहाँ जोखिमपूर्ण अवस्थामा फेला पारेपछि भारतीय प्रहरी तथा नेपाली राजदूतावासको समन्वयमा उद्धार गरिएको हो ।