पर्यटन र कृषिबाटै नवलपरासीलाई समृद्ध बनाउने कंडेलको दाबी

Advertisement

परासी– पश्चिम नवलपरासी निर्वाचन क्षेत्र नं. १ का प्रतिनिधिसभा सदस्य उम्मेदवार विजय कंडेलले पर्यटन र कृषिको आधुनिक विकासमार्फत नवलपरासीलाई देशकै नमुना र समृद्ध जिल्ला बनाउने उद्घोष गरेका छन् । उज्यालो नेपाल पार्टीका उम्मेदवार कंडेलले पत्रकार भेटघाटमा जिल्लाको आर्थिक विकासका लागि आफूसँग स्पष्ट र व्यावहारिक कार्यसूची रहेको दाबी गरे ।

Advertisement

उज्यालो नेपालका जिल्ला संयोजक अमुल पाण्डेको नेतृत्वमा अहिले चुनावी प्रचार प्रसार र कार्यकर्ता भेटघाट तीव्र पारिएको छ । संयोजक पाण्डेका अनुसार चुनावी घोषणापत्र तयारीको अन्तिम चरणमा रहेको र फागुन ४ गतेदेखि व्यापक घरदैलो कार्यक्रम सुरु गरिनेछ ।

‘म भाषण होइन, देखिने र छोइने परिवर्तन गर्न चुनावी मैदानमा आएको हुँ,’ कंडेलले आफ्नो प्रतिबद्धता दोहोर्याउँ भने ।

सुस्ता–३, नवलपरासीका स्थायी बासिन्दा कंडेल अंग्रेजी साहित्यमा स्नातकोत्तर हुन् । केही वर्ष अस्ट्रेलियामा बसेर त्यहाँको विकास र प्रविधिलाई नजिकबाट अनुभव गरेका कंडेल स्वदेशमै केही गर्ने उद्देश्यले नेपाल फर्किएका हुन् । हाल उनी एक सफल उद्यमीको रूपमा स्थापित छन्।

काठमाडौं र चितवनमा ‘हाइजेनिक मिट सेन्टर’, एचएमसी फुड्स, हाइजेनिक एग्रो टुरिजम फार्म, र होटल तथा रेस्टुरेन्ट व्यवसायमा उनले संचालन गरेका छन् । यसअघि उनले काठमाडौंलाई धुलोरहित बनाउन ‘जाग्यो नेपाल’ अभियानको नेतृत्व गरेका थिए । २०७९ को निर्वाचनमा काठमाडौं क्षेत्र नं. ५ बाट समेत प्रतिस्पर्धा गरेका थिए ।

‘विगतमा निर्वाचित नेताहरूले जनताको प्रतिनिधि भएको बिर्सेर व्यक्तिगत स्वार्थमा लागेका कारण देशले दुःख पायो,’ कंडेलले भने । देशको थलिएको अर्थतन्त्र, कुटनीति र प्रशासनिक विकृति अन्त्य गर्न युवाहरूको नेतृत्व अनिवार्य रहेको तर्क उनको छ । युवालाई व्यवसायसँग जोड्ने र उपलब्ध साधन–स्रोतको उच्चतम सदुपयोग गरी ‘किसानलाई मालिक’ बनाउने आफ्नो मुख्य लक्ष्य रहेको उनको भनाइ छ ।

उज्यालो नेपाल पार्टीका संस्थापक केन्द्रीय सदस्यसमेत रहेका कंडेलले जिल्लाको समृद्धिका लागि आफ्नो स्पष्ट खाकासहित चुनावी मैदानमा उत्रिएको जनाएका छन् ।

वाचा होइन, काम गरेर देखाउन आएको उनले बताए । कंडेलले नवलपरासी–१ का लागि पर्यटन, कृषि र प्रविधिलाई मुख्य आधार बनाएका छन् । रामग्राम स्तुप, त्रिवेणी धाम र सुस्ता क्षेत्रलाई पर्यटकीय हब बनाउने उनको योजना छ । उखु, केरा र धानको न्यूनतम समर्थन मूल्य कार्यान्वयन गर्ने, डिजिटल सुशासन मार्फत जनताका गुनासो ४८ घण्टाभित्र सम्बोधन गर्ने र सडक निर्माणको डिजिटल निगरानी गर्ने योजना उनले अघि सारेका छन् । गाउँमै ‘स्किल हब’ स्थापना गरी युवाहरूलाई आईटी र प्राविधिक शिक्षामा दक्ष बनाउने आफूले योजना बनाएको कंडेलले बताए ।

उम्मेदवार कंडेलले नवलपरासीका ऐतिहासिक र धार्मिक स्थलहरूको विकास नै जिल्लाको ठूलो पहिचान भएको बताए । ‘रामग्राम स्तुप, त्रिवेणी धाम, मदार बाबा, अनोमा घाट, पाल्ही भगवती, महलपोखरी र सुस्ता जस्ता क्षेत्रहरूको उचित प्रचार–प्रसार र पूर्वाधार विकास गर्न सके यहाँ पर्यटकको घुइँचो लाग्नेछ,’ उनले भने । पर्यटनलाई स्थानीय रोजगारीसँग जोड्न आफूले विशेष योजना ल्याएको उनको तर्क छ ।

कृषि क्षेत्रमा रहेको बिचौलिया प्रथाको अन्त्य गर्दै कंडेलले कृषकलाई ‘मालिक’ बनाउने ठोस खाका प्रस्तुत गरे । उनका अनुसार उखु, केरा, धान र दूध जस्ता उत्पादनमा न्यूनतम समर्थन मूल्य सुनिश्चित गर्ने कानुन निर्माण गरिनेछ । उनले भने, ‘हाम्रो पार्टीले कृषिमा क्रान्ति ल्याउने नीति लिएको छ, अब किसानले पसिनाको उचित मूल्य पाउनेछन् ।’

परम्परागत राजनीतिभन्दा फरक ढंगले अघि बढेका कंडेलले मतदातासँग सिधा जोडिन उज्यालो नवलपरासी एपको अवधारणा ल्याएका छन् । ४८ घण्टाभित्र जनताका गुनासो सम्बोधन गर्ने र सांसदको कामको मासिक ‘रिपोर्ट कार्ड’ सार्वजनिक गर्ने प्रतिबद्धता उनले जनाएका छन् । यस्तै, सडक निर्माणमा हुने ढिलासुस्ती रोक्न मोबाइलबाटै डिजिटल निगरानी गर्ने प्रणाली बसाल्ने उनको योजना छ ।

कंडेलले शिक्षा, स्वास्थ्य र सामाजिक समानताका विषयलाई पनि प्राथमिकतामा राखेका छन् । हरेक विद्यालयसम्म कंक्रिट बाटो पुर्याउने र गाउँमै विशेषज्ञ सेवाका लागि ‘मोबाइल मेडिकल युनिट’ सञ्चालन गर्ने उनले बताए । जातीय छुवाछुत र विभेद विरुद्ध शून्य सहनशीलताको नीति अपनाउने उनको योजना छ । शुद्ध खानेपानी, हरित गाउँ निर्माण र विपन्न परिवारलाई बिजुली महसुलमा सहुलियत दिने कंडेलले योजना अघि सारेका छन् ।