बासुदेव घिमिरेः एमाले छाडे, फर्किए, अनि एमालेबाटै उम्मेवार बने

Advertisement

भैरहवा– तीन साता अघि एमाले रुपन्देही वृत्तमा खैलाबैला मच्चियो, एमाले रुपन्देहीका नेता तथा क्षेत्र नम्बर ५ का निवर्तमान प्रतिनिधि सभा सदस्य बासुदेव घिमिरेले पार्टी परित्याग गरे भनेर । रास्वपा नेता बालेन शाहसँग विगतदेखि नै नजिक रहेका घिमिरे अब उतै जान्छन् भन्ने अड्कल भयो । घिमिरेका सहयोगीले यो कुरालाई थप बल पुग्ने गरी सहमती जनाए । तर, बासुले भने आफै रास्वपा जाने घोषणा गरिसकेका थिएनन् ।

Advertisement

एमाले छाडेको घोषणा बीच एमाले उपाध्यक्ष विष्णुप्रसाद पौडेल रुपन्देही आएर घिमिरेसँग भेटे । लामो छलफल पछि उनी एमालेमै रहने निर्णय भयो । एमाले केन्द्रीय सदस्यमा पराजित भए पछि एमाले छाडेका घिमिरेलाई विष्णुले सम्झाएर पार्टीमै रहने निश्चित गरे । तिलोत्तमा नगरपालिकाका पूर्व मेयर समेत रहेका घिमिरे स्थानीय रुपमा चर्चित छन् ।

यिनै घिमिरेलाई नेकपा एमालेको सचिवालय बैठकले रुपन्देही क्षेत्र नम्बर ३ बाट प्रतिनिधि सभाको उम्मेदवार बनाउने निर्णय गरेको छ । केही साताअघि मात्रै सामाजिक सञ्जालमार्फत पार्टीको जिम्मेवारीबाट अलग भएको घोषणा गरेका घिमिरेले अन्ततः एमालेबाटै टिकट सुरक्षित गरेपछि फेरि चर्चामा आएका छन् । उनलाई पार्टी छाड्ने धम्की दिएर टिकट लिएको आरोप लागेको छ । उनीसँगै क्षेत्रबाट उम्मेदवार बन्न चाहाने धेरै थिए । तर, घिमिरेले पार्टी छाड्छु भनेर घुक्र्याएर टिकट लिएको एक नेताले बताए ।

गत पुस १५ गते घिमिरेले फेसबुकमार्फत एमालेको सबै जिम्मेवारी त्याग गरेको घोषणा गरेका थिए । उनले आम जनताको चाहना सुशासन, विकास र समृद्धिसँगै नेतृत्व हस्तान्तरण र पुस्तान्तरण भएको उल्लेख गर्दै पुराना राजनीतिक दलहरूको मुख्य नेतृत्वबाट नागरिकको अपेक्षा सम्बोधन हुने अवस्था नदेखेकाले आफू अलग भएको बताएका थिए । त्यतिबेला उनी राष्ट्रिय स्वतन्त्र पार्टी (रास्वपा) मा प्रवेश गर्ने र रुपन्देही–२ बाटै चुनाव लड्ने चर्चा थियो ।