भारतमा हुने अन्तर्राष्ट्रिय च्याम्पियनसिपमा नेपाली कराँते खेलाडीले स्पर्धा गर्ने

पब्लिक कुरा
२०८२ पुष ८

832 Share

भैरहवा– नेपाली राष्ट्रिय कराँते टीम भारतमा हुने अन्तर्राष्ट्रिय कराँते च्याम्पियनसिपमा भाग लिन जाने भएको छ । जापान गोजुरियो कराँते डो मिसन संघ नेपालको नेतृत्वमा नेपाली टीम भारत जान लागेको हो । संघले मंगलबार भैरहवामा पत्रकार सम्मलेन गरी यसबारे जानकारी दिएको हो । भारतको महाराष्ट्रस्थित पुणेमा यही पुस पुस १४ र १५ (डिसेम्बर २९ र ३०) गते १७ औं अन्तर्राष्ट्रिय खुल्ला कराँते च्याम्पियनसिप–२०२५ हुँदैछ ।

प्रतियोगितामा नेपालसहित भारत, श्रीलंका, बंगलादेश र भुटान गरी पाँच राष्ट्रका खेलाडीहरुको सहभागिताता रहनेछ । उक्त प्रतियोगितामा नेपाली टीमको नेतृत्व गर्दै प्रमुख प्रशिक्षक काजी रानासहित भारत जाँदैछन् । नेपाली टीममा २२ कराँते खेलाडी, प्रशिक्षक र अफिसियल ६ जना गरी २८ जना सहभागी हुनेछन् । संघका सचिव गिरीप्रसाद पुनले विगतका वर्षहरुमा जस्तै यसपटक पनि उत्कृष्ट प्रदर्शन गर्दै स्वर्णपदक जित्ने विश्वास व्यक्त गरे ।

प्रमुख प्रशिक्षक तथा संघका संस्थापक काजी रानाले प्रशिक्षण अनुशासन, शिक्षा खेल कौशल हेरेर खेलाडी छनोट गरिएकाले च्याम्पियन बन्ने विश्वास व्यक्त गरे । उनले नेपाली टीमले आर्थिक अभाव लगायतका कारण भारत बाहेक अन्य देशमा प्रतियोगितामा सहभागी हुन जान नसकेको गुनासो गरे ।

संघका लुम्बिनी प्रदेश सल्लाहकार भरत केसीले नेपालको मान राख्न खेलाडीहरुलाई शुभकामना दिए । उनले राम्रो प्रशिक्षण लिएको र लगनशील भएकाले उपाधि जित्ने विश्वास गरे । कुनै तहका सरकारले सहयोग नगरेको उनको दुखेसो थियो ।

प्रतियोगितामा सहभागी हुन जाने खेलाडीहरु लुम्बिनी प्रदेशका जिल्लाहरुका छन् । संघका अनुसार भारतमा नेपाली खेलाडीले उमेर र तौल समूहमा स्पर्धा गर्नेछन् । नेपाली टीम यसअघि २०१७, २०२१ र २०२३ मा च्याम्पियन बनेको थियो ।