विमानस्थलमा सफल परीक्षण उडानपछि व्यवसायी उत्साहित
भैरहवा– मुलुककै दोस्रो अन्तर्राष्ट्रिय विमानस्थल गौतमबुद्ध अन्तर्राष्ट्रिय विमानस्थलमा अप्रेसन फ्लाइट (परीक्षण उडान) सफल भएपछि यस क्षेत्रमा खुशीयाली छाएको छ । विमानस्थल निर्माण सुरुपछि धमाधम लुम्बिनी क्षेत्रमा लगानी गरिरहेका उद्योगी, पर्यटन व्यवसायीलगायत स्थानीयमा निर्माण सम्पन्न भएर परीक्षण उडान सफल भएपछि खुशीयाली छाएको हो ।
‘लुम्बिनी क्षेत्रको विकासको ढोका खोल्न अब विमानस्थल कोशेढुंगा सावित हुने हाम्रो अपेक्षा छ’, सिद्धार्थ उद्योग बाणिज्य संघका अध्यक्ष भीष्मप्रसाद न्यौपानेले भने, ‘लामो प्रतीक्षा सफल भएको छ । सरकारी सबै किसिमका तयारी गरेर नियमित व्यवसायिक उडानको चाजोपाजो भने मिलाउनुपर्छ ।’
गौतमबुद्ध विमानस्थल संचालन गर्ने सकारी तयारीसँगै रुपन्देही मात्रै होइन्, लुम्बिनी प्रदेशकै बासिन्दा र यस क्षेत्रमा लगानी गरेका हजारौं लगानीकर्ता उत्साहित छन् । सरकारले आउँदो जेठ २ गते बुद्ध पूर्णिमा दिनबाट व्यवसायिक उडान गर्ने तयारी गरेको छ ।
विमानस्थललाई लक्षित गरेर व्यवसायीले भाडामा सटर खोज्नेदेखि अर्बौं रुपैयाँ ऋण लिँदै पाँचतारे होटल र हाउजिङमा लगानी गरिरहेका छन् । स्तरीय रेष्टुरेन्ट, यातायात, जमिन भाडामा लिएर आधुनिक कृषि, पशुपालन, उद्योगमा लगानी गर्ने व्यवसायीसमेत कयौं छन् । भैरहवा र लुम्बिनी क्षेत्रमा मात्रै होइन, विमानस्थललाई लक्षित गरेर नवलपरासी, बुटवल, कपिलबस्तु क्षेत्रमा समेत लगानी बढ्दै गएको छ ।
‘विमानस्थल संचलनमा आउँदा थला परेको पर्यटन क्षेत्र उकासिने मात्रै होइन्, नेपाली उत्पादन विदेश निकासीमा समेत सहज हुनेछ’, न्यौपानेले भने । नेपाल वायुसेवा निगमको ३३० एयरबस (वाइडबडी) माफर्त बिहीबार गौतमबुद्ध विमानस्थलमा परीक्षण उडान गरिएको थियो ।
यसअघि नयाँ वर्षका दिन बैशाख १ गते परीक्षण उडान हुने भनिए पनि स्थगित गरिएको थियो । संस्कृति, पर्यटन तथा नागरिक उड्डयन मन्त्रालयका सचिव महेश्वर न्यौपानेले झण्डै ७४ वर्षपछि मुलुकमा अन्तर्राष्ट्रिय विमानस्थल संचालनमा आउनु खुशीको कुरा भएको बताएका छन् ।
निर्माणमा ढिलाई हुँदा निरास बनेका व्यवसायी विमानस्थलमा परीक्षण उडान सफल पछि अब व्यवसायिक उडानको प्रतीक्षामा छन् । लुम्बिनी क्षेत्रमा पछिल्लो समयमा विमानस्थललाई पछ्याउँदै सबैभन्दा धेरै होटलमा लगानी बढेको छ । भैरहवा–लुम्बिनी क्षेत्रमा मात्रै ७ वटा पाँचतारे होटल निर्माण भएका छन् । जसमध्ये दुईवटा संचालनमा आइसकेका छन् । अन्य संचालनको तयारीमा छन् । व्यवसायीकाअनुसार रुपन्देहीसहित नवलपरासी, कपिलबस्तुमा पनि होटल निर्माणको कार्य तिब्र छ ।
‘पछिल्लो आठ वर्षमा मात्रै चार दर्जन चारतारे होटल निर्माण भएका छन् । साना होटलको निर्माण गनिसाध्य छैन, यो पर्यटन क्षेत्रका लागि खु्शीको कुरा हो’, सिद्धार्थ होटल संघ नेपालका महासचिव रवीन्द्र शर्मा घिमिरेले भने । यो विमास्थल संचालनको सुरुमा दैनिक १० वटा र सन् २०३३ सम्म दैनिक ६० वटा अन्तर्राष्ट्रिय उडान भर्ने लक्ष्य सरकारले राखेको छ ।
विमानस्थलमा यसअघि यान्त्रिक परीक्षण उडान सफल भइसकेको छ । पर्यटन व्यवसायी एवं लुम्बिनी होटल संघ नेपालका अध्यक्ष गोविन्द ज्ञवालीले विमानस्थल नै अब लुम्बिनी प्रदेशको उद्योग, पर्यटन, कृषि, पशुपालन लगायतका क्षेत्रमा लगानी गर्ने लगानीकर्ता र स्थानीय समुदायको आर्थिक समृद्धिका लागि आशा र भरोसाको आधार बनेको बताए ।
‘आठ वर्ष अघि भैरहवामा विमानस्थलको शिलान्यास भएपछि व्यवसायीहरुले आफ्नो घरखेत बिक्री गरेर, बैंकमा धितो राखेर चर्को व्याजमा ऋण लिदै लगानी गरेका थिए’, ज्ञवालीले भने, ‘बीचमा काममा विलम्ब हुँदा व्यवसायीमा निराशा थियो । अब भने विमानस्थल संचालनमा आएपछि बिदेशी मुलुकसंगको सिधा उडानले पर्यटन र औद्योगिक क्षेत्रमा लुम्बिनी प्रदेशले अर्को छलाङ मार्ने आशा म जस्ता धेरै व्यवसायी छ’, उनले भने ।
लेखकको सम्वन्धमा