रूपन्देही–३ मा मतदाताको राम्रो समर्थन पाइरहेका छौंः रास्वपा

पब्लिक कुरा
२०८२ फाल्गुन ६

991 Share

भैरहवा– राष्ट्रिय स्वतन्त्र पार्टी (रास्वपा) रूपन्देही क्षेत्र नम्बर–३ का प्रतिनिधिसभा सदस्य उम्मेदवार डा.लेखजंग थापा पहिलो चरणको मतदाता भेटघाट पूरा गरेर दोस्रो चरणमा घरैदैलो गरिरहेका छन् । आफ्नो क्षेत्रको वस्तुस्थिति संकलन गरेर घैरदैलोमा पुगिरहेका थापाले सम्भव योजना र एजेण्डामात्र प्र्रस्तुत गरिरहेको जनाएका छन् । असम्भव वाचा गरेर मतदातालाई निराश नबनाउने उनले बताए ।

रास्वपा रुपन्देही–३, का चुनावी कमाण्डर नारायण भण्डारीले पहिलो चरणमा क्षेत्रमा रहेका ३६ वडामा प्रचार अभियान पूरा भइसकेको जनाए । फागुन ४ गतेबाट दोस्रो चरण अन्तर्गत औपचारिक रुपमा घरदैलो मार्फत् मतदाता समक्ष पुगिरहेको बताए । घरदैलोको बीचमा आम कार्यकर्तालाई सम्बोधन गर्र्ने गरि आमसभाको तयारी भइरहेको पनि उनले जनाए ।

‘यो गर्छम, त्यो गर्छम भनेर प्रतिवद्धता जनाउने तर, पूरा नगर्ने कुरामा हामीलाई विश्वास छैन,’ भण्डारीले भने, ‘मुलुक परिवर्तनका लागि आवश्यक र सम्भव वाचा मात्र गरिरहेका छौं ।’

यसपटक भ्रष्टाचार निवारण र सुशासन कायम गर्ने नारालाई पार्टीले जोड दिइरहेको उनले बताए । यसक्रममा क्षेत्रमा आवश्यक भौतिक विकासका योजना र सुशासनका एजेण्डा प्रस्तुत गरिरहेको उनले बताए । प्रचार अभियानका क्रममा व्यापक जनसमर्थन मिलिरहेको उनले बताए । ‘वडा–वडामा गरिने कार्यक्रम र र्यालीमा व्यापक सहभागिता बढिरहेको छ,’ उनले भने, ‘जनताको रेसपोन्स राम्रो पाइरहेका छौं । यसले हामीलाई हौंस्याएको छ । खुसी छौं ।’

यसअघि निर्वाचन प्रचारका लागि रुपन्देहीमा रास्वपा सभापति रबि लामिछाने र बरिष्ठ नेता बालेन्द्र शाह आइसकेका छन् । त्यसक्रममा जिल्लाका पाँच वटै निर्वाचन क्षेत्रमा रोड सो गरिए पनि रविले सम्बोधन गर्दा बालेनले गरेका थिएनन् । सभापति लामिछानेले छोटो भनाई राखे पनि बरिष्ठ नेता शाहले एक शब्द बोलेका थिएनन् । कार्यकर्ताले भने नेताहरुलाई सम्बोधनका लागि अनुरोध गरेका थिए ।

कमाण्डर भण्डारीले आम जनताको माग अनुसार फागुन ९ गते भैरहवाको अञ्चलपुरमा आमसभा राखिएको जनाए । उक्त सभामा सभापति लामिछाने र बरिष्ठ नेता शाह सहभागी हुने कार्यक्रम छ । रास्वपाले उक्त सभाको तयारी गरिरहेको छ । उक्त सभामा दुबै नेताले यहाँका नागरिकको अपेक्षा सम्बोधन गर्ने र प्रतिवद्धता सार्वजनिक गर्ने जानकारी भण्डारीले दिए ।